बिनियोजन विधेयक दथुइया दफाबार सहलह
व्यवस्थापिका संसदय् आथिर्क दँ ०६८/६९ या थीथी मन्त्रालय अन्तर्गतया बिनियोजन विधेयक दथुइया दफाबार सहलह बुधवाः नं जुल ।
व्यवस्थापिका संसद्या विनियोजन विधेयक दथुइया सहलहसं ब्वति कासें कांग्रेस नेता प्रकाशमान सिंहं वर्तमान सरकारं सत्ताया दुरुपयोग यानाः शान्ति प्रकि्रया स्यंकेत स्वःगु द्वपं बियादिल । सिंहं युद्धकालया गम्भिर अपराध व मानव अधिकार उल्लंघनया मुद्दात लित कायेमज्यूगु धयादिल । व्यवस्थापिका संसद् बैठक न्ह्यानाच्वंगु इलय् सरकारं संसदया मानहानी जुइकथं संसद्यात छलय् यानाः राहत ज्याझ्वः हःगु धासें वय्कलं च्यूताः प्वंकादीगु खः ।
मुँज्याय् एमालेया रामचन्द्र झा वर्तमान सरकारं राज्य संयन्त्रया दुरुपयोग यानाः थः कार्यकर्तादथुइ साङघातिक हमला जूगु धयादिल । अथेहे कांग्रेस नेता रामशरण महतं बजेटया उद्देश्य गलत जूगुलिं थःगु पार्टीया बजेटय् असहमति दुगु न्ह्यःथनादिसें प्रधानमन्त्री लिसे मन्त्री परिशादाया ज्याकू शीर्षकया खर्च रकम म्हो यायेमाःगु प्रस्ताव न्ह्यब्वयादीगु खः । महतं बजेटं उत्पादन वृद्धि व आर्थिक अनुशासन कायम यानाः तयेत ध्यान बीत सुझाव बियादिल ।
अर्थमन्त्री वर्षमान पुनं वंगु २६ भदौसं विनियोजन विधेयक संसदय् न्ह्यब्वयेवं सहलह न्ह्याःगु खः ।
