समायोजन बारे प्याकेजय् हे सहमति यायेमाःगु कांग्रेस अडान
नेपाली कांग्रेसं माओवादी लडाकु समायोजन बारे प्याकेजय् हे सहमति यायेमाःगु अडान कायेवं माओवादी व कांग्रस दथुइ थौं जूगु वार्ता बिनानिष्कर्ष क्वचाःगु दु ।
प्रधानमन्त्री निवास बालुवाटारय् निगू दलत दथुइ जूगु खँल्हाबंलाय् प्रधानमन्त्री डा. बाबुराम भट्टराईं थः राष्ट्रसंघया महासभाय् वने न्ह्यः लडाकु पुनःवर्गिकरण यायेगु धासें सहमतिया कुतः यानादीगु खः । तर कांग्रेसं समायोजनया मोडालिटी, समायोजन जुइपिं लडाकूतय् ल्याः व पुनःस्थापना जुइपिं लडाकुतय्त बिइगु राहत लगायतया खँ प्याकेजय् सहमति यायेमाःगु अडान काःगु खः ।
माओवादीपाखें प्रमुख स्वम्ह नेतातय्सं ब्वति काःगु मुँज्याय् कांग्रेस सभापति सुशील कोइराला अनुपस्थित जुयादीगुलिं माओवादी नायः पुष्पकमल दाहाल 'प्रचण्डं' वय्कः नाप याकनं हे नापलाना सहलह यानादीगु जूगु दु ।
थौंया मुँज्याय् माओवादी पाखें नायः प्रचण्ड, वरिष्ठ उपाध्यक्ष मोहन वैद्य 'किरण' व प्रधानमन्त्री भट्टराईया ब्वति दुगु खःसा कांग्रेसपाखें उपसभापति रामचन्द्र पौडेल महामन्त्री कृष्ण सिटौला व नेता डा. रामशरण महतया ब्वति दुगु खः ।
News Location:
