प्रधानमन्त्रीपाखें शपथ ग्रहण
प्रधानमन्त्री माधवकुमार नेपालं पद तथा गोपनियताया शपथ ग्रहण यानादीगु दु ।
राष्ट्रपति डा. रामवरण यादवं प्रधानमन्त्री नेपालयात पद तथा गोपनियताया शपथ ग्रहण याकादीगु खः । राष्ट्रपति निवास शितल निवासय् राष्ट्रपति पाखें शपथ कयादिम्ह वयेक निम्हम्ह प्रधानमन्त्री खः । थ्व स्वयाः न्ह्यः निवर्तमान प्रधानमन्त्री पुष्पकमल दाहाल प्रचण्डं नं वयेक पाखें हे शपथ ग्रहण यानादीगु खः ।
प्रधानमन्त्रीया सपथ ग्रहण ज्याझ्वलय् उपराष्ट्रपति परमानन्द झा, सभामुख सुवास नेम्वाङ, पुलांपिं प्रधानमन्त्रीत, प्रमुख दलया नेतात, सभासदत, नागरिक समाजया प्रतिनिधि, उच्च पदस्थ अधिकारी, कुटनीतिक नियोगया पदाधिकारीतय् उपस्थिति दुगु ख: ।
प्रधानमन्त्रीया सपथ ग्रहणय् निवर्तमान प्रधानमन्त्री व माओवादी अध्यक्ष पुष्पकमल दाहाल उपस्थित जुयामदीसां माओवादी संविधानसभा दलया उपनेता नारायणकाजी श्रेष्ठया उपस्थित दुगु ख: । अथेहे प्रधानमन्त्री नेपालया सपथ ग्रहणया ईलय् प्रधानसेनापति रुक्मांगद कटवाल, कुलबहादुर खड्का लगाया नं उपस्थिति दुगु ख: ।
