संवैधानिक समितिया बैठक निष्कर्ष विहीन
संविधानसभाया ई तनेधुंकाः हाकनं मेगु ई स्वला तनेवं न्हापांगु खुसिइ च्वंगु संवैधानिक समितिया बैठक निष्कर्ष विहीन जूगु दु । शान्ति प्रकृया निष्कर्षय् मथ्यंत्तले संविधान च्वयेगु न्ह्यःने यंकेमफइगु कांग्रेसया अडान व शान्ति संविधानय् शर्त तयेमज्यूगु प्रधानमन्त्रीया लिसःलिपा मंगलवाः च्वंगु संवैधानिक समिति बिना निर्णय क्वचाःगु खः ।
कांग्रेसपाखें उपसभापति रामचन्द्र पौडेलं शान्ति प्रकृया पूमवंसे संविधान च्वयेगु ज्या न्ह्यःने न्ह्यायेमफइगु अडान लिसा कायेवं प्रधानमन्त्री डा. भट्टराईं शान्ति व संविधानय् सर्त मतयेत इनाप याःगु खः ।
मंगलवाः बैठक बिना एजेण्डा सःतूगु धासें स्वतन्त्र सभासद बब्बन सिंह धाःसा बैठक ज्वःछि धर्ना च्वंगु खः । जटिलता चीकेगु विषयसं सामान्य सहलह जूसां नं छु नं सहमति जुइमफूगु बैठकय् ब्वति दुम्ह समिति दुजः लक्ष्मणलाल कर्णं जानकारी बियादिल ।
विवाद समाधान उपसमितिया संयोजक माओवादी नायः पुष्पकमल दाहालं विवाद समाधान यायेमफइगु जूसा उपसमिति विघटन यायेगु प्रस्ताव तःसां नं उकिइ नापं ठोस निर्णय जुइफूगु मदुनि ।
समितिया ज्याकू सिंहदरबारय् च्वंगु मुंज्याय् चीधंगु दलतय्सं तःधंगु दलतय्गु कारण संविधान मदयेकूगु धासें च्यूताः प्वंकूगु खः ।
