झिदँया सशस्त्र युद्धया इलय् तयातःगु फुक्क मुद्दा लित काइगु
नवनियुक्त महान्यायाधिवक्ता मुक्ति प्रधानं झिदँया सशस्त्र युद्धया इलय् माओवादी नेता कार्यकर्ता दथुइ तयातःगु फुक्क मुद्दा लित काइगु धयादीगु दु ।
मंगलवाः येँय् ग्वसाः ग्वःगु साक्षात्कार ज्याझ्वलय् न्ववानादिसें प्रधानं शासन व्यवस्था विरुद्ध ल्वायेगु भुवलय् तयातःगु फुक्क मुद्दा राजनीतिक जूगुलिं राजनीतिक प्रतिशोधया आधारय् तयातःगु अज्याःगु फुक्क मुद्दा लित काइगु खँ धयादीगु खः ।
२०४६ सालनिसें हे राजनीतिक प्रकृतिया मुद्दा लित कायेगु ज्या न्ह्यायेधुंकूगु न्ह्यःथनादिसें वय्कलं मुद्दा लित मकाःगु जूसा माधवकुमार नेपाल, केपी ओली, झलनाथ खनाल फुक्कसिनं "ज्यानमार्ने उद्योग"य् नीदँ जेल सजाँय फयेमाःगु बिचाः तयादीगु खः ।
वय्कलं राजनीतिक प्रतिशोध द्वन्द्व आन्दोलनया आधारय् तयातःगु मुद्दा लित कायेगु सिद्धान्तय् च्यूताः प्वंकेमजिउगु धयादिसें राजनीतिक खोलं त्वःपुयाः याःगु गम्भीर प्रकृतिया मुद्दा धाःसा लित कायेमजिउगु स्पष्ट यानादीगु खः ।
भारतया पटना उच्च अदालतं झिंछम्ह माओवादी नेता कार्यकर्तादथुइ न्यंकूगु सजाँयबारे गृहकार्य न्ह्यानाच्वंगु धासें सरकारं पाय्छि कथं पलाः न्ह्याकेगु नं वय्कलं जानकारी बियादीगु खः ।
थ्वहे दथुइ संयुक्त राष्ट्रसंघं मानवअधिकार उल्लंघन लिसे युद्ध अपराधया पीडकतय्त आममाफी मबीत इनाप याःगु दु । माओवादीं द्वन्द्वकालय् लाःगु मुद्दात लित कायेत माग यानाच्वंगु इलय् राष्ट्रसंघया नेपाःसं च्वंगु आवासीय प्रतिनिधि रोबर्ट पाइपर व मानवअधिकार उच्चायुक्तया ज्याकू प्रमुख ज्योति साङघेरां मंगलबाः मंकाः विज्ञप्ती पिकयाः गम्भीर अपराधया मुद्दाय् आममाफी बीगु वा मुद्दा लित कायेगु माग मयायेत दलतय्त इनाप नापं याःगु दु ।
