माओवादीपाखें कब्जा यानातःगु छेँ, बुँ लित बिइत सरकारया उजं
सरकारं झिदँया जनयुद्धया झ्वलय् माओवादीपाखें कब्जा यानातःगु सामन्त लिसें जमिन्दारतय्गु छेँ, बुँ लित बिइत उजं बिउगु दु ।
प्रधानमन्त्रीया राजनीतिक सल्लाहकार देवेन्द्र पौडेलं जनयुद्धया झ्वलय् माओवादीं नियन्त्रणय् काःगु सामान्त लिसें जमिन्दारतय्गु छेँ, बुँ लित बिइगु नितिं थःगु पार्टी व राज्यया निकाययात उजं बिइधुंकूगु जानकारी बियादीगु खः ।
प्रधानमन्त्री ज्याकू सिंहदरबारय् मंगलवाः पत्रकारतलिसे खँल्हाबँल्हा यानादिसें पौडेलं शान्ति प्रकि्रयायात निष्कर्षय् थ्यंकेत प्रधानमन्त्रीं गम्भीरतालिसे कुतः यानाच्वनादीगु प्रष्ट यानादीगु खः ।
वय्कलं शान्ति प्रकि्रयायात निष्कर्षय् थ्यंकेत कांग्रेस व एमालें कब्जा यानातःगु छेँ, बुँ लित बीकेगु नितिं सः तयाः वयाच्वंगु व थुगु विषयसं सरकारं प्राथमिकता बियाः ज्या न्ह्याकेधुकूगु नापं जानकारी बियादीगु खः ।
श्रोतया कथं सरकारया थुगु पलाःयात कयाः माओवादीदुने हे आपालं असन्तुष्टी न्यनावंगु दु । पार्टीदुने नापं सहलह मयासे प्रधानमन्त्री लिसे पार्टी न्वकु डा. बाबुराम भट्टराईं प्रशासनया बलय् कब्जा सम्पत्ति लित बीगु नितिं उजं बीगु जनविरोधी ज्या जुइगु माओवादीदुनेया हे नेतातय्सं सः तयाच्वंगु खँ सीदुगु दु ।
