सहमति लिपा उपकुलपति विवाद समाधान
तत्कालीन झलनाथ खनाल नेतृत्वया सरकारं देय्न्यंकया न्हय्गू विश्वविद्यालयलय् उपकुलपति नियुक्त यायेवं पिहांवःगु विवाद अन्ततः समाधान जूगु दु ।
प्रधानमन्त्री डा. बाबुराम भट्टराईया आव्हानय् सोमवाः थीथी विश्वविद्यालयया उपकुलपति व आन्दोलनरत प्राध्यापकत दथुइ जूगु खँल्हाबंलाय् सहमति जुइवं लच्छि न्ह्यः निसें जुयाच्वंगु तालाबन्दी चालीगु सहमति जूगु खः ।
सहमति कथं आःया उपकुलपतितय्त हे कायम यानातयेगु व लिपा उपकुलपति लगायत मेमेगू पदय् नियुक्त यायेगु इलय् आवश्यक ऐन देय्काः योग्यता व स्वच्छताया आधारय् नियुक्त यायेगु नापं सहमति व समावेशीय तरिकां अज्याःगु नियुक्त यायेगु क्वःछिउगु दु ।
न्हय्गू हे विश्वविद्यालयया पदाधिकारीत नाप सहलह जूगु खःसां संस्कृत विश्वविद्यालयलय् धाःसा सहमति जुइमफुत । अन उपकुलपति बाहेक मेमेगू पदय् नं नियुक्त सम्बन्धी विवाद दुगुलिं समस्या समाधान जुइमफुगु खः ।
