मुद्दा लितकायेत प्रमपाखें भारतया राजदूतयात इनाप
भारतया पटना उच्च अदादतं एनेकपा (माओवादी)या झिंछम्ह नेतात विरुद्ध न्यंकूगु कैद व जरिवानाया सजायया मुद्दा लितकायेत ग्वाहालि यायेत प्रधानमन्त्री डा. बाबुराम भट्टराईं नेपाःया निंतिं भारतया राजदूत जयन्त प्रसादयात इनाप याःगु दु ।
माओवादी न्वकु नापं जुयादीम्ह प्रधानमन्त्री भट्टराईं नेपालय् राजनीतिक हिउपाः वयेधुंकाः नं पुलांगु हे मुद्दाय् माओवादी नेतातय्त न्यंकूगु फैसला असान्दर्भिक जूगु धयादिसें लितकायेत ग्वाहालि यायेत इनाप यानादीगु खः । संहदरवारस्थित प्रधानमन्त्रीया ज्याकूथी जूगु खँल्हाबंलाय् प्रधानमन्त्रीं पटना अदालतया फैसला प्रति सरकारया गम्भीर ध्यानाकर्षण जूगु धयादिसें दूतावासयापाखें अग्रसरता कायेत इनाप यानादिल ।
लिसःलय् राजदूत प्रासदं फैसलाया बारे राज्य सरकारनाप जानकारी कयाः नेपाः सरकारयात लिसः बिइगु खँ धयादीगु खः ।
थ्वहे दथुइ महान्याधिवक्ता मुक्ति प्रधानं पटना उच्च अदालतं माओवादी नेतातय्त न्यंकूगु सजायया फैसला अध्ययन जुयाच्वंगु धयादिसें गृहकार्य लिपा जक सरकारं छगू निष्कर्ष पिकाइगु धयादिल ।
