चर्चय् बम बिष्फोटनया छानबिन यायेत माग
ख्रीष्टिन सुझाब समितिं यलया धोविघाटस्थित चर्चय् निम्ह मनू सीकथं याःगु बम बिष्फोटनया छानविन यायेत सरकारलिसे उच्चस्तरिय छानबिन समिति गठनया माग याःगु दु । समितिं थौं येँय्या जनसंचार अभियानय् पत्रकार सम्मेलन यानाः दोषीयात कडा कारवाही व मृतकया थःथितिपिंत उचित राहत बिइत माग याःगु दु ।
पत्रकार सम्मेलनय् न्वंवापिं आपालं बक्तातय्सं घटनाया अपराधीयात ज्वनाः कानुनकथं कार्वाहीया माग याःगु दु । ज्याझ्वलय् नेपाल बार एशोशीएसनया नायः विश्बकान्त मैनालीं फुक्क नागरिकत एकताबद्ध मजूगु कारण आपराधीक गतिविधि अप्वःगु बिचाः तयादीगु दु । अथेहे सभासद विनोद पहाडीं हिन्दुया सम्राट मानय् याइम्ह जुजु थनेगु राजनीतिक समिकरण जूगु हे दिंसं थज्याःगु घटना जुइगु सुखद मजूगु टिप्पणी यानादीगु दु ।
अथेहे बिश्व हिन्दू महासंघं छगू बिज्ञप्ती पिथना घटनाया भत्स्रना याःगु दु ।
