एकीकृत माओवादी सरकारय् मवनीगु
एकीकृत नेकपा माओवादीया नेता नारायणकाजी श्रेष्ठ प्रकाशं बर्तमान सरकार साचालनया नितिं दयेकीगु उच्चस्तरिय राजनितीक संयन्त्रय् एकीकृत माओवादी ब्वति मकायेगु धयादीगु दु । रिपोटस्र क्लबपाखें थौं याःगु साक्षात्कारय् न्वंवानादिसें नेता प्रकाशं एमाले नेतृत्वय् अबैधानिक तरिकां सरकार गठन जूगुलिं सरकार साचालनया राजनितीक संयन्त्रय् थःपिं ब्वति मकायेगु धयादीगु खः ।
जनतां थ्व स्वयां न्ह्यः हे क्वःथले धुंकूगु पार्टीतय्गु गठबन्धनपाखें निर्माण जूगु वर्तमान सरकार याकनं हे क्वःदलीगु समेत दावी यानादीगु दु । बर्तमान सरकारया गठबन्धनकारी दलतय्सं माओवादीयात याकःयासें सेना समायोजन जुइमबीकेगु नितिं षडयन्त्र याःगु धासें नेता प्रकाशं माओवादीयात राष्ट्रियताया अडान त्वःताः छुं दलतय्सं विदेशीशक्ति न्ह्यःने आत्मसमर्पण याकेत व संसदीय यथास्थितिइ हयेत स्वःगु द्धपं बियादीगु दु ।
ज्याझ्वलय् न्वंवानादिसें एमाले नेता प्रदीप ज्ञवालीं न्हूगु संविधान इलय् हे दयेकीगु धासें राष्ट्रिय सहमतिया सरकार दयेकेमाःगु खँ कुलादीगु दु । उकथं हे नेपाली काङ्ग्रेसया नेता रामशरण महतं माओवादीं प्रतिबद्धता पुरा यायेमफुगुलिं आःया परिस्थिति सृजना जूगु धयादीगु दु । वय्कलं माओवादीया हे मुर्खतां माओवादी नेतृत्वया सरकार क्वःदःगु धयादीगु दु । वय्कलं संघियता खतराय् लायेफुगु जूगुलिं फुक्कसिनं उखे पाखें ध्यान बिइमाःगु धायदीगु दु ।
अथेहे मधेशी जन अधिकार फोरमया जितेन्द्र देवं एक मधेश एक प्रदेशया माग पुरा यायेगु सर्त व सहमतिलिसे थःगु पार्टीं एमाले नेतृत्वया गठवन्धन सरकारयात समर्थन याःगु धयादिसें उकियात कार्यान्वयन यायेत नेकपा एमालें सम्झौता याःगु खुलासा यानादीगु दु । उकथं हे राष्ट्रिय जनमोर्चाया चित्र बहादुर के सीं संघियतां मुलुक विखण्डन याइगु जूगुलिं उकियात पनेमाःगु बिचाः तयादीगु दु ।
