माधब नेपाल नापलाये ज्याय् ब्यस्त
नबनिर्बाचित प्रधानमन्त्री माधब कुमार नेपाल थौं सुथंनिसें हे राजनीतिक तथा कुटनीतिक नापलाये ज्याय् ब्यस्त जुयादीगु दु । भारतीय राजदूत राकेश सुदं नबनिर्बाचित प्रधानमन्त्रि माधबकुमार नेपालयात थौं नापलानादीगु दु । नेपाल निबास कोटेश्वरय् जूगु नापलाये ज्याय् न्हूगु सरकार गठन व नेपाल भारत सम्बन्धयाबारे सहलह जूगु जानकारी ब्यूगु दु ।
थौं हे नबनिर्बाचित प्रधानमन्त्री माधब कुमार नेपाल व नेपालस्थित अनमिन प्रमुख करिन ल्याण्डगे्रन दथुइ नं नापलाये ज्या जूगु दुसा अनमिन प्रमुख ल्याण्ड गे्रनं प्रधानमन्त्रीइ निर्बाचित जुयादीगुलिं नेपालयात भिंतुना बियादीगु खः । नापलाये ज्याय् समसामयिक राजनीतिक अबस्था व सेना समायोजनया बिषयसं समेत सहलह जूगु दु । अथेहे माधब नेपाल व नेपाली काँग्रेसया सभापति गीरिजा प्रसाद कोइरालादथुइ नं थौं सनिलय् नापलाये ज्या जूगु दु । कोइराला निबास महाराजगाजय् जूगु नापलाये ज्याय् सरकार गठन व मन्त्रालय बाँडफाँडया बिषयसं सहलह जूगु खः ।
