सरकार गठनया लागि एमाले हे अग्रसर जुइमाःगु काँग्रेसया निष्कर्ष
नेपाली काँग्रेसं मन्त्रि मण्डल गठनया प्रकृया न्ह्यःने न्ह्याकेत एमालेयात इनाप याःगु दु । पार्टी सभापति गिरिजाप्रसाद कोइराला निबास महाराजगाजय् थौं च्वंगु काङ्ग्रेसया प्रभाबशाली नेतातय्गु बैठकं गठबन्धनकारी दलतय्गु सहमति यानाः सरकार गठनया प्रकृया न्ह्यःने न्ह्याकेत इनाप याःगु खः ।
बैठकं प्रधानमन्त्रिइ एमालेया माधब कुमार नेपाल निर्बाचित जुइधुंकूगुलिं दलतय्त सहमतिइ हयाः सरकार गठन यायेत एमालें हे कुतः यायेमाःगु निष्कर्ष पिकाःगु दु । सरकारय् सहभागी दल व मन्त्रालय बाँडफाँड सरकारया साझा न्युनतम ज्याझ्वः सरकार साचालनया नितिं उच्चस्तरिय राजनीतिक संयन्त्र गठनय् प्राथमिकता बिइत एमालेयात इनाप यायेगु बैठकं निर्णय याःगु नेता बिमलेन्द्र निधीं जानकारी बियादीगु दु ।
काँग्रेसं सुयागु नेतृत्वय् सरकारय् ब्वति कायेगु धइगु बारे धाःसा क्वःछुइ फुगु मदुनि । काँग्रेशयापाखें नेता रामचन्द्र पौडेलं नेतृत्व यायेगु कि देउवा पक्षया विमलेन्द्र निधिं याइगु धइगु विषयसं विवाद खनेदुगु स्रोतया धापू दु । काङ्ग्रेसदुने सभापति कोईरालाया हे लिपांगु निर्णय जुइगु जूगु दु ।
