संवैधानिक निकायया प्वनाच्वंगु पदय् लच्छियादुने पदाधिकारी नियुक्त यायेत सरकारयात उजं
संसदया राज्य व्यवस्था समितिं संवैधानिक निकायया प्वनाच्वंगु पदय् लच्छियादुने पदाधिकारी नियुक्त यायेत सरकारयात उजं बिउगु दु ।
समितिया आइतवाः च्वंगु मुँज्यां सम्भावित उम्मेदवारपिनिगु धलः दयेकाः योग्य मनू ल्ययेगु नितिं नियुक्तिया कुतः यायेत नं उजं बिउगु दु । नापनापं नियुक्तिया आधार व मापदण्ड दयेकाः संस्थागत निर्णय यायेगु पद्धति लागू यायेत नं समितिं धाःगु दु ।
संवैधानिक परिशादया सिफारिसय् संसदीय सुनुवाईपाखें अनुमोदित पदाधिकारीया नियुक्ति लिपा पदीय दायित्व कथंया ज्याखँ पूवंके मफूगू अवस्थाय् बाहेक राजनीतिक हिउपाः जुइवं आस्थाया लिधंसाय् चीकेगु पाय्छि मजूगु समितिं दाबी याःगु दु । राज्य व्यवस्थां देय् संघीयताय् वनेधुंकाः माःगु प्रशासनिक संयन्त्रयात छु गुकथं व्यवस्थापन यायेगु सम्बन्धी सरकारया अवधारणा व रणनीति माःगु भौतिक पूर्वाधारया तयारी लगायतया विशयस उच्च प्राथमिकताया लिसे संघीयता कार्यान्वयन तयारीइ माःगु गृहकार्य यायेत नापं प्रधानमन्त्रीयात उजं बिउगु समितिया छम्ह दुजलं जानकारी बियादिल ।
दलतदथुइ भागबण्डा मिलय् मजुयाः अख्तियार दुरुपयोग अनुसन्धान आयोग लोकसेवा आयोग लगायतया संवैधानिक निकाय प्रमुख बिहीन जुयाच्वंगु दु ।
