सरकार बिरुद्ध शान्तिपूर्ण प्रतिबाद न्ह्यानाच्वनी : प्रचण्ड

एकीकृत नेकपा माओवादीया नायः पुष्पकमल दाहाल प्रचण्डं मुलुकय् आः नं युद्ध व अस्थीरता द्धःचिनाः देय्यात पुलांगु हे अबस्थाय् लिछ्वयेत यथास्थितिवादी शक्तिं षडयन्त्र यानाच्वंगु धयादीगु दु । देशय् न्हूगु पुलांगु न्याय अन्याय तथा अग्रगमन-प्रतिगमनदथुइ च्वयेया स्तरय् जूगु समस्यां राजनैतिक उतार चढाव हःसां नं अन्त्यय् न्हूगु अग्रगमन व न्याय हे त्याइगु बिश्वास प्वंकादीगु दु ।

नेपाल राष्ट्रिय उद्योग बाणिज्य संघया न्हापांगु राष्ट्रिय अधिवेशनया थौं येँय् उलेज्या ज्याझ्वलय् न्वंवानादिसें वय्कलं आः नं अन्यायया पक्षधरत माओवादी हाकनं युद्धय् वनेमाः धइगु इच्छा दुगु धयादीगु दु । लिपांगु चरणय् जूगु राजनीतिक घटनाक्रमत राष्ट्र व जनहितय् स्वयां व्यक्तिगत स्वार्थय् जुयाच्वंगु धयादिसें थ्व इलय् उद्योगी व्यवसायी व फुक्क जनतां खबरदारी यायेमाःगु खँ धयादीगु दु । थःगु नेतृत्वया सरकारं राजनीतिक अर्थतन्त्र व विदेश नीतिइ सकारात्मक सुरुवात यायेत स्वःसां नं थःत लोकतन्त्रवादी धाईपंसं हे लोकतन्त्रयात हेस्याःगु वय्कःया धापू दु ।

वय्कल सरकारबिरुद्ध शान्तिपूर्ण प्रतिबाद न्ह्याकाः च्वनेगु नं धयादीगु दु । काङ्ग्रेस सभापति गिरिजाप्रसाद कोइरालां धाथें तुं सहमती व सहकार्यया विकल्प मदुगु धयादिसें प्रचण्डं न्ह्यसः तयादीगु दु ल्वखाय् तालं ग्वयाः छेँय्या न्ह्यःने ल्यूने काँडेतार तयाः करेन्ट स्वायेवं सहमति व सहकार्य गुकथं संभब जुइ वय्कलं थःपिं न्ह्याबलें सहमति सहकार्य व एकताया हे पक्षय् दुगु स्पष्ट यानादीगु दु । वय्कलं थःम्हं नेतृत्व यानागु सरकारं मेहेनत पूर्बक ल्ह्वंगु राजस्व आःया न्हूगु सरकारं भ्रस्टाचार याइगु खँय् आशंका प्वंकादीगु दु ।

ज्याझ्वलय् एकीकृत नेकपा माओवादीया बरिष्ठ नेता डाक्टर बाबुराम भट्टराईं स्वाधीन अर्थतन्त्रया विकासया नितिं एकीकृत नेकपा माओवादीं सरकारपिने नं जिम्मेवारी बहन यायेगु धयादीगु दु । थःम्हं ज्या यानागु इलय् ९० प्रतिशत उद्यमी व्यवसायीत औद्योगिक विकासया नितिं सकारात्मक दुगु धयादिसें डा. भट्टराईं निजी क्षेत्रयात ग्वाहालि यायेत इनाप यानादीगु दु । संबिधानसभा चुनाबं देश न्ह्याकेत माओवादीयात ड्राइभर काङ्ग्रेसयात कन्डक्टर व एमालेयात खलाँसीया हैसीयत ब्यूगु धासें भट्टराइं धयादी 'शान्ति प्रकि्रया न्ह्यःने न्ह्यानाच्वंगु इलय् दथुइया लँय् ड्राईभरयात चीकाः खलासीयात गाडी चलय् याके बिइबलय् गन्तब्यय् थ्यनी मथ्यनी थःम्हसिनं बिष्लेषण यानादिसँ' ।