चर्च विष्फोटया छानबिन यायेत उच्चस्तरीय समिति गठन
गृह मन्त्रालयं शनिवाः यलय्या एजम्पसन चर्चय् जूगु बम विष्फोटया बारे छानबिन यायेत छगू उच्चस्तरीय समिति गठन याःगु दु ।
आइतवाः न्हिनय् गृह मन्त्रालयलय् च्वंगु उच्चस्तरीय सुरक्षा संयन्त्रया आकस्मिक बैठकं उगु निर्णय याःगु खः । नेपाल प्रहरीया प्रहरी नायब निरीक्षक कुबेरसिंह राणाया संयोजकत्वय् स्वम्ह दुजः दुगु छानाबिन समिति गठन याःगु खः । समितिइ संयोजक राणा नापं सशस्त्र प्रहरीया वरिष्ठ प्रहरी उपरिक्षक सिंहबहादुर श्रेष्ठ ज राष्ट्रिय अनुसन्धान आयोगया उप-अनुसन्धान निर्देशक अर्जुन केसी दुथ्याः ।
उच्चस्तरीय सुरक्षा संयन्त्रया बैठकय् गृहसचिव गोविन्द कुसुम, नेपाल प्रहरीया महानिरीक्षक रमेशचन्द ठकुरी, सशस्त्र प्रहरीया महानिरीक्षक सनतकुमार बस्नेत, राष्ट्रिय अनुसन्धान आयोगया प्रमुख अनुसन्धान निर्देशक अशोकदेव भट्ट व सह सचिव नविनकुमार घिमिरेया उपस्थिति दुगु खः ।
