प्रधानमन्त्री नेपालयात भारतया भिंतुना
व्यवस्थापिका संसदं प्रधानमन्त्री पदय् निर्विरोध निर्वाचित जुयादिम्ह माधवकुमार नेपालयात भारतीय समकक्षी मनमोहन सिंहं आइतवाः फोन यानाः भिंतुना बियादीगु दु । नेपालया कार्यकालय् निगू देय् दथुइया स्वापू अझ क्वातुइगु विश्वास नं भारतीय प्रधानमन्त्रीं सिहं प्वंकादिल ।
थ्वहे दथुइ थौं हे भारतीय राजदूत राकेश सुदं प्रधानमन्त्री नेपालयात नापलानादीगु दु । वयेकलं कोटेश्वरय् च्वंगु प्रधानमन्त्रीया निजी निवसय् वनाः नेपाःया राजनीतिक अवस्थाया बारे खँल्हानादीगु खः । अथेहे वयेकलं प्रधानमन्त्री पदय् नियुक्त जुयादिगुलिं प्रधानमन्त्री नेपालयात भिंतुना नं बियादिल ।
माओवादीं माधव नेपाल भारतीय इसाराय् प्रधानमन्त्री जूगु धकाः द्वपं बियाच्वंगु ईलय् प्रधानमन्त्रीया सपथ काय् न्ह्य् हे सुदं प्रधानमन्त्रीयात नापलानादीगु दु । थ्व नापं सुद न्हूम्ह प्रधानमन्त्रीयात नापलानादिम्ह न्हापांम्ह कुटनीटिज्ञ जुयादीगु दु ।
अथेहे प्रधानमन्त्री नेपालयात अनमिनया प्रमुख करिन ल्याण्डग्रेनं नं नापलाना भिंतुना बियादीगु दु ।
