माओवादी केन्द्रीय समितिया मुँज्या स्थगित / आः असोज १३गते च्वनीगु
एकीकृत नेकपा (माओवादी)या लडाकुत तयातःगु शिविर व ल्वाभः तयातःगु कन्टेनरया ताःचा लःल्हाये धुंकाः पिहांवःगु विवाद ज्यंकेत असोज १ गते निसें च्वनेगु धाःगु माओवादी केन्द्रीय समितिया मुँज्या निवाःया निंतिं स्थगित याःगु दु ।
माओवादी नायः पुष्पकमल दाहाल 'प्रचण्ड'या न्हू बजारस्थित छेँय् च्वंगु पदाधिकारीतय् मुँज्यां असोज १३ गते निसें च्वनीगु कथं केन्द्रीय मुँज्या स्थगित याःगु खः । पदाधिकारी मुँज्यां प्रधानमन्त्री नापं पार्टी न्वकु डा. बाबुराम भट्टराई राष्ट्रसंघीय महसभाय् ब्वति कायेत असोज २ गते न्यूयोर्क वनेत्यंगुलिं केन्द्रीय मुँज्या निवाः लिपा यायेगु निर्णय याःगु खः ।
प्रधानमन्त्री भट्टराई प्रधानमन्त्री जुइधुंकाः माओवादी शिविर व ल्वाभःया ताःचा सेना समायोजन विशेष समितियात लःल्हायेधुंकाः माओवादीया न्वकु मोहन वैद्य 'किरण' पक्षं उकिया विरोध यानाच्वंगु दु । वैद्य पक्षं थःगु हे नेतृत्व विरुद्ध कडा रुपं प्रस्तुत जुइवं विवाद समाधान यायेत केन्द्रीय समितिया मुँज्या आव्हान याःगु खः ।
