योजना आयोगया उपाध्यक्षय् दीपेन्द्र बहादुर क्षेत्री
सरकारं राष्ट्रिय योजना आयोगया उपाध्यक्षय् पुलाम्ह गर्भनर दीपेन्द्र बहादुर क्षेत्रीयात नियुक्त याःगु दु ।
मन्त्रिपरिषद्या बिहीवाः च्वंगु मुँज्यां योजना आयोगया उपाध्यक्ष दिनेशचन्द्र देवकोटाया राजीनामा स्वीकृत यानाः क्षेत्रीयात नियुक्त याःगु खः । अथेहे आयोगया दुजःलय् जनक शाह व शिवकुमार राईयात नियुक्त याःगु दु ।
सरकारं जनतायात राहत बिइगु ज्याझ्वःयात अन्तिम रुप बिइत अर्थमन्त्री वर्षमान पुन 'अनन्त', भौतिक योजना मन्त्री हृदेश त्रिपाठी, उर्जामन्त्री पोष्टबहादुर बोगटी व स्वास्थ्य मन्त्री राजेन्द्र महतोयात जिम्मा बिउगु दु ।
अथेहे सार्वजनिक सेवायात समावेशी दयेकेत संसदय् विचाराधिन विद्येक लितकयाः संशोधन यायेगु निर्णय याःगु दुसाः सार्वजनिक ज्याझ्वलय् राष्ट्रिय वसः दाउरा सुरुवाः पुनेमाः धकाः तत्कालीन माधवकुमार नेपाल नेतृत्वया सरकारं याःगु निर्णय भिंकेगु निर्णय नं मन्त्रिपरिषद्या मुँज्यां याःगु दु ।
मन्त्रिपरिषदं सरकारया प्रवक्तया जिम्मा उपप्रधान नापं परराष्ट्रमन्त्री नारायणकाजी श्रेष्ठ 'प्रकाश'यात बिउगु दु । अथेहे प्रधानमन्त्रीया राजनीतिक सल्लाहकारय् देवेन्द्र पौडेल व प्रेस सल्लाहकारय् रामरिजन यादवयात नियुक्त याःगु दु ।
मुँज्यां संयुक्त राष्ट्रसंघया महासभाय् ब्वति कायेत प्रधानमन्त्री भट्टराईया नेतृत्वय् झिंस्वम्ह दुजः दुगु पुचः उखे पखे वनेगु निर्णय नं याःगु दु ।
