गृहमन्त्रालयपाखें बीगु राहत लिसे सुधारया ज्याझ्व: घोषणा
उपप्रधान लिसे गृहमन्त्री बिजय कुमार गच्छेदारं मन्त्रालयपाखें बीगु राहत लिसे सुधारया ज्याझ्व: घोषणा यानादिल ।
गृहमन्त्रालयसं बुधवाः पत्रकार सम्मेलन यानाः वय्कलं तत्कालिन, मध्यकालिन व दीर्घकालिन यानाः स्वंगू ब्वय् राहत लिसे सुधारया ज्याझ्व: घोषणा यानादीगु खः ।
अपहरण फिरौती, बलात्कार नियन्त्रण, गुण्डागर्दी नियन्त्रण यायेगु व तराई लिसे पूर्वी पहाडी जिल्लाय् सशस्त्र समूहया गतिविधि नियन्त्रण लगायतया ज्यायात तत्कालिन ज्याझ्वलय् तयादीगु खः । अथेहे राजमार्गय् सुरक्षा, कृतिम मूल्यवृद्धि नियन्त्रण लिसे सुधार स्वनिगःया सवारी आवागमनय् सुधार लिसे औद्योगिक सुधारयात नं आः तत्कालया राहत ज्याझ्वलय् कःघाःगु दु । फुक्क जिल्ला प्रशासन ज्याकूपाखें राहदानी वितरण यायेगु, योजना सुरक्षाकर्मी, घरेलु कामदारया रुपय् जूगु छ्यलाबुलाया अन्त्य, नमूना जिल्ला प्रशासन घोषणा, चेलीबेटी बेचबिखन नियन्त्रण मध्यकालिन राहत लिसे सुधारया ज्याझ्व:त दुथ्यानाच्वंगु दु । दीर्घकालिन राहत लिसे सुधारया ज्याझ्वलय् प्रहरी सेवा आयोग नीस्वनेगु गुण्डागर्दी ऐन दयेकेगु आदि दुथ्यानाच्वंगु दु ।
पत्रकार सम्मेलनय् गृहमन्त्री गच्छेदारं थुपिं राहतया ज्याझ्वलं जनतां सुरक्षाया अनूभुति यायेगु व सर्वसाधारणं राहत दइगु विश्वास प्वंकादिल ।
