वर्तमान सरकारया आयु स्वला
सूचना लिसे साचारमन्त्री जयप्रकाश प्रसाद गुप्तां थः संलग्न वर्तमान सरकारया आयु स्वला जक जूगु धयादीगु दु ।
रिपोर्टस्र क्लबया नेतृत्वय् साचारमन्त्री गुप्तायात नापलायेत वंपिं पत्रकार पुचःलिसे खँल्हाबँल्हा यानादिसें वय्कलं सरकार नीस्वंगु झिन्हुतक्क नं मन्त्री परिषद्यात पूर्णता बिइमफूगु सत्तारुढ दलतय्गु कमजोरी व असफलता जूगु दाबी यानादिल ।
वय्कलं सत्तारुढ दलत सरकारय् वनेगु विषयलय् जूगु खिचातानी हे कारण सहमति कार्यान्वयनय् हाथ्या जूगु न्ह्यःथनादिल । झिंन्यान्हुयादुने समावेशी विधेयक परिमार्जन यानाः संसदय् पेश यायेमाःगु कूटनीतिक व संवैधानिक नियुक्तिया नितिं नां प्रस्ताव यायेमाःगु व याकनं जनताया नितिं राहत ज्याझ्व: हयेमाःगुलिइ मुँज्या नापं च्वनेमफुगु खँय् वय्कलं चिउताः प्वंकादिल । प्यंगू बँदाया सहमति कार्यान्वयनय् छु नं ठोस ज्या यायेमफयाः सत्तारुढ दलत अलमलय् जूगुलिं सरकार नं अलमलय् लाःगु मन्त्री गुप्ताया धापू खः ।
अथेहे स्वास्थ्य मन्त्री राजेन्द्र महतों शान्ति व संविधान निर्माणया प्रकि्रया न्ह्यःने मन्ह्याःसा पीन्यान्हुयादुने मधेशी मोर्चा सरकारपाखें पिहांवनेगु धयादिल । धनगढीइ पत्रकारतलिसे महतों शान्ति व संविधान निर्माणया एजेण्डा माओवादीया नितिं अग्निपरीक्षा जूगु व सरकारया नेतृत्वया नितिं मधेशी मोर्चां याःगु ग्वाहालि माओवादीया नितिं लिपांगु ह्वःताः जूगु धयादिल ।
