प्यंगू भातृ संगठनत विघटन यायेगु प्रस्ताव
नेपाली कांग्रेस केन्द्रीय समितिया मुँज्याय् ई क्वचाये धुंकुगु प्यंगू भातृ संगठनत विघटन यायेगु प्रस्ताव न्ह्यब्वःगु दु ।
पार्टी ज्याकू सानेपाय् बुधवाः च्वंगु मुँज्याय् महामन्त्री प्रकाशमान सिंहं तरुण दल, महिला संघ, आदिवासी जनजाति संघ व नेपाल प्रजातान्त्रिक सेनानी संघ विघटन यायेगु प्रस्ताव न्ह्यब्वयादीगु खः । महामन्त्री सिंहं ई क्वचायेधुंकूगु भातृ संगठनत विघटन यानाः तदर्थ समिति नीस्वनेगु व खुला निसें दच्छिया दुने चुनाव याकेगु प्रस्ताव न्ह्यब्वयादीगु खः ।
उगु प्रस्तावयात कयाः जूगु सहलहस केन्द्रीय दुजःत विभाजित जूगु दु । सभापति सुशील कोइराला पक्षधरं महामन्त्रीया प्रस्तावयात समर्थन याःगु दु । संस्थापन पक्षया मानबहादुर विश्वकर्मा सूर्यमान गुरुङ उमाकान्त चौधरी लिसें दुजःतय्सं नेपाल विद्यार्थी संघयात विघटन यायेधुंकूगु अवस्थाय् मेमेगु संगठनयात नं विघटन यायेमाःगु खँ धाःगु दु ।
वरिष्ठ नेता शेरबहादुर देउवा पक्षधर धाःसा आःया हे नेतृत्वयात निश्चित इलय् चुनाव याके बीमाःगु धाःगु दु । विमलेन्द्र निधि गोपालमान श्रेष्ठ लिसेंया दुजःतय्सं निर्वाचित जूगु वर्तमान कार्यसमितियात हे महाधिवेशन याकेबीमाःगु तर्क न्ह्यब्वःगु दु ।
