पुलांपिं प्रमतय् सुझाव - 'शान्ति वं संविधान प्रक्रिया पूवंकादिसं'
प्रधानमन्त्री डा. बाबुराम भट्टराईयात पुलांपिं प्रधानमन्त्रीतय्सं इलय् हे शान्ति प्रक्रिया व संविधान निर्माण यायेगु ज्या पूवंकेत सुझाव बिउगु दु ।
प्रधानमन्त्री भट्टराईं २०४६ सालया जनआन्दोलन लिपाया प्रधानमन्त्रीतय्त बुधवाः मंकाः कथं नापालानादीगु इलय् वय्कःपिंसं अज्याःगु सुझाव बिउगु खः । सिंहदरवारय् जूगु नापलाय् ज्या पुलांपिं प्रधानमन्त्रीतय्सं शान्ति व संविधान निर्माण प्रक्रिया क्वचायेकेगु, जनतायात राहत उपलब्ध याकेगु व सुशासन कायम यायेगु हे आःया मू आयवश्यकता जूगुलिं उकि ध्यान बिइत प्रधानमन्त्रीयात इनाप याःगु खः ।
अथेहे उगु इलय् माओवादीं थःगु नेतृत्वय् सरकार गठन जूसाः लत्याया दुने लडाकुतय् समायोजन व पुनःस्थापना क्वचायेकेगु निर्णय याःगु प्रति नं प्रधानमन्त्री भट्टराईया ध्यानाकर्षण याकूसें उगु ज्या इलय् हे क्वचासाः भट्टराईया तःधंगु उपलब्धी जुइगु खँ न्ह्यथंगु खः ।
प्रधानमन्त्री जूगु इलय् राज्य संचानलया अनुभव कालबिल यायेत प्रधानमन्त्री भट्टराईं पुलांपिं प्रधानमन्त्रीत नाप मंकाः कथं सहलहया आव्हान यानादीगु खः । उगु इलय् पुलांपिं प्रधानमन्त्रीत सूर्यबहादुर थापा, लोकेन्द्र बहादुर चन्द, शेरबहादुर देउवा व झलनाथ खनालया उपस्थिति दुगु खः ।
