प्रधानमन्त्री डा. भट्टराईं थःगु विदेश भ्रमण अमेरिकापाखें न्ह्याकीगु
प्रधानमन्त्री डा. बाबुराम भट्टराईं थःगु विदेश भ्रमण अमेरिकापाखें न्ह्याकीगु जूगु दु । प्रधानमन्त्री डा. भट्टराई वइगु असोज ३ गतेनिसें न्ह्याइगु संयुक्त राष्ट्र संघया महासभाय् ब्वति कायेत अमेरिका वनेत्यंगु खः ।
प्रधानमन्त्रीया प्रमुख स्वकीय सचिव गंगा श्रेष्ठया कथं प्रधानमन्त्री डा. भट्टराईया नेतृत्वया पुचः वइगु असोज २ गते राष्ट्रसंघया महासभाय् ब्वति कायेत न्यूयोर्क वनेगु तयारी यानाच्वंगु दु ।
प्रधानमन्त्रीया भ्रमणया बारे परराष्ट्र मन्त्रालयया संयुक्त राष्ट्र संघ महाशाखां गृहकार्य यानाच्वंगु दु । महाशाखाया प्रमुख रुद्रकुमार नेपालया कथं प्रधानमन्त्रीं राष्ट्रसंघया महासभायात सम्बोधन यायेगु नापं लगानी प्रबद्र्धन सम्बन्धि मुँज्या व निगू पक्षीय भेटवार्ताय् ब्वति कयादी ।
बालुवाटारया श्रोत कथं विदेश भ्रमणय् वनेगु इलय् राज्यकोषपाखें खर्च याइगु जूगुलिं मजिमगाःपिनिगु जक चीधंगु पुचः यंकेगु तयारी यायेत प्रधानमन्त्रीं उजं बियादीगु दु । उगु पुचलय् प्रधानमन्त्री भट्टराईलिसें उपप्रधान नापं परराष्ट्रमन्त्री नारायणकाजी श्रेष्ठ सरकारया मुख्य सचिव माधव घिमिरे प्रधानमन्त्रीया प्रमुख स्वकीय सचिव गंगा श्रेष्ठ अर्थमन्त्री वर्षमान पुनसहित झिंछम्ह जक दुथ्याइगु खँ धाःगु दु ।
श्रोतया कथं प्रधानमन्त्री डा. भट्टराईया उगु अमेरिका भ्रमण न्यान्हुया जुइ । राष्ट्रसंघया महासभाय् राष्ट्र प्रमुख वा सरकार प्रमुख वनीगु परम्परा दुगुलिं जक अन वनेत्यंगु धासें सरकारया न्हापांगु प्राथमिकता धइगु शान्ति व संविधान दयेकेगु जूगुलिं आः थथें भारत, चीन लिसेंया देशया भ्रमणया ज्याझ्वः मदुगु खँ न्ह्यथंगु दु ।
थ्वस्वयां न्हयः डा. भट्टराई प्रधानमन्त्रीइ निर्वाचित जुइवं भारतीय प्रधानमन्त्री मनमोहन सिंहं टेलिफोन यानाः भिन्तुना बिसें भारत भ्रमणया नितिं ब्वंगु खःसा चीन नं भ्रमणया नितिं ब्वनेधुंकूगु दु ।
