राज्य पुनःर्संरचनाया निंतिं सशर्त विज्ञतय्गु पुचः दयेकेत सहमत
नेपाली कांग्रेस राज्य पुनःर्संरचनाया निंतिं सशर्त विज्ञतय्गु पुचः दयेकेत सहमत जुइधंकाः राज्य पुनःसंरचना आयोगया खँय् दलत दथुइ खनेदयाच्वंगु विवाद क्वचाइगु जूगु दु ।
संसदीय दलया नेता रामचन्द्र पौडेलया संयोजकत्वय् दुगु संविधान निर्माण सुझाव समितिया सोमवाः च्वंगु मुँज्यां राज्य पुनःर्संरचनाया निंतिं आयोग दयेकेगुया विकल्प मालेफइगु खँ धयादीगु खः ।
कांग्रेसं अन्तरिम संविधान संशोधन यानाः संविधानसभापाखें विज्ञतय्गु पुचः नीस्वनेमाःगु शर्त तःगु दु । विज्ञतय्गु पुचः नीस्वनेगु इलय् आःया संविधानय् व्यवस्था यानातःगु राज्य पुनःर्संरचना आयोगया हे ज्याया लागा व कार्यविधी जुइमाःगु खँय् बः बिउगु दु । उगु पुचःया ई निला तक तयेफइगु कांग्रेसया धापू दु । थुकिया सुझाव समितिं थौं च्वनीगु केन्द्रीय समितिया मुँज्याय् थःपिनिगु प्रस्ताव न्ह्यब्वइगु नेता अर्जुन नरिसंह केसीं जानकारी बियादीगु दु ।
अन्तरिम संविधानय् राज्य पुनःर्संरचनाया निंतिं उच्चस्तरिय आयोग नीस्वनेगु न्ह्यथनातःसां दलत दथुइ सहमति जुइफयाच्वंगु मदुनि । माओवादी नायः प्रचण्ड तत्कालीन प्रधानमन्त्री जुयाच्वंगु इलय् सरकारं राज्य पुनःर्संरचना आयोगु दयेकूगु खःसां नं कांग्रेस लिसेंया मेमेगु दलं ग्वाहालि मयागुलिं ज्या जुइमफूगु खः ।
लिपांगु इलय् संवैधानिक समिति अन्तरगतया विवाद समाधान उपसमितिइ कांग्रेस बाहेकया फुक्क दलत राज्य पुनःर्संरचनया नितिं आयोगया पलेसा विज्ञतय्गु पुचः दयेकेफइगु सहमत जुइधुंकूगु दु ।
