देय् दबूया पुलांपिं दुजःपिंत विदाई
किपू (सन्ध्या टाइम्स) / नेवाः देय् दबूया पुलांपिं पदाधिकारीतय्त म्हिगः थनया श्रीकीत्ति विहारय् छगू ज्याझ्वः यासें विदाई बीगु ज्या जुल । ज्याझ्वलय् देय् दबूया न्हूम्ह नायः नरेश ताम्राकारं सकलें पुलांपिं पदाधिकारीपिंत सुभाय्पौ लःल्हानादीगु खःसा संरक्षक लक्ष्मण राजवंशीं लुमंति चिं सुकुन्दा लःल्हानादीगु खः ।
ज्याझ्वलय् न्ववासें पुलांम्ह नायः मल्ल के. सुन्दरं नेवाः देय् दबूयात आः पुलांगु संरचना कथं न्ह्याके मफइगु जूगुलिं थुकिया संरचना हीकाः न्हूगु संरचना कथं न्ह्याकेमाःगु सुझाव बियादिल । लिसें वय्कलं नेवाः देय् दबूया न्हूपिं पदाधिकारीतय्सं नेवाः स्वायत्त राज्य पलिस्था यायेगु ज्याय् मू वंगु भूमिका म्हितीगु आशा नं प्वंकादिल ।
ज्याझ्वलय् पुलांम्ह न्वकु मोहनकृष्ण डंगोल, मूछ्यांज्ये पवित्र वज्राचार्य, दांभरि विनोदराज राजभण्डारी, दुजः डा. पाचनारायण महर्जनिपंसं नं नुगःखँ प्वंकादीगु खः ।
उगु हे ज्याझ्वलय् संरक्षक लक्ष्मण राजवंशीं देय् दबूया न्हूपिं पदाधिकारीपिंत नं खादा क्वखायेकाः लसकुस यानादीगु
खः ।
उगु विदाई व सुभाय् ज्याझ्वलय् न्हूपिं पदाधिकारीपिं दिपक शाक्यं लसकुस यानादीगु खःसा धर्मशोभा तुलाधरं सुभाय् देछानादीगु खः ।
