'स्वला दुने शान्ति प्रक्रिया पूमवंसाः फुक्कं असफल'
एकीकृत नेकपा (माओवादी)या नायः पुष्पकमल दाहाल 'प्रचण्डं' स्वलाया दुने शान्ति व संविधन निर्माण प्रक्रिया पूवंकेमफुसाः फूक्कं राजीनीतक दलत असफल जुइगु खँ धयादीगु दु । वय्कलं फुक्कं राजनीतिक दलत छगू हे डुंगाय् च्वना वनाच्वंगुलिं डुंगा डुबे जूसाः डुंगाय् सवार फुक्कं छक्वलं डुबे जुइगु धयादिल ।
एबीसी टेलिभिजनया प्यक्वःगु वाषिर्कोत्सवया लसताय् येँय् याःगु छगू ज्याझ्वलय् नायः प्रचण्डं शान्ति व संविधान निर्माण प्रक्रिया क्वचायेकेत स्वला फुक्क राजनीतिक दलया निंतिं अग्निपरिक्षा जूगु धयादिल । वय्कलं डा. बाबुराम भट्टराई नेतृत्वया सरकार गठन जुइकाः शान्ति प्रक्रियां गति काःगु धयादिसें उकियात पूवंकेत थः प्रतिबद्ध जूगु धयादिल ।
आःया स्वला जनअपेक्षा कथं शान्ति व संविधानय् केन्द्रीत जुइमाःगुलिं सुयातं ब्वःबिइगु वा तुति सालेगु ज्या मयायेत वय्कलं इनाप यनादिल । वय्कलं राजनीतिक दलतय्सं गल्ती याःसां उकियात सुस्केगु ज्या याइगुलिं नेपाःया राजनीतिं उचाई कायेमफुगु दावी यानादिल ।
अथेहे ज्याझ्वलय् कांग्रेस महामन्त्री प्रकाशमान सिंहं लडाकु शिविरया ताःचा लःल्हायेगु ज्या स्वागतयोग्य जूसां लडाकुत शिविरपाखें खाली मजुइकं माओवादी नेतृत्व स्वीकार यायेमफइगु धयादिल । एमाले न्वकु बामदेव गौतमं एमालें न्ह्यावलें बांलागु ज्या याइपिंत समर्थन याइगु व बांमलागु ज्या याइपिंत विरोध याइगु धयादिल ।
