प्रम व प्रचण्डं कोइराला नापलात
प्रधानमन्त्री डा. बाबुराम भट्टराई व एनेकपा (माओवादी)या नायः पुष्पकमल दाहाल 'प्रचण्डं' नेपाली कांग्रेसया सभापति सुशील कोइराला नापलाना शान्ति प्रक्रियाया बारे खँल्हाबंला याःगु दु ।
सोमवाः सुथय् येँया महाराजगञ्जस्थित कोइराला निवास थ्यंकाः प्रधानमन्त्री भट्टराई व माओवादी नायः प्रचण्डं शान्ति प्रक्रिया क्वचायेकेत व सेना समायोजन यायेत वर्तमान सरकार प्रतिबद्ध दुगु धासें उकी ग्वाहालि यायेत इनाप याःगु खः । निम्ह नेतातय्सं लडाकु शिविरया ताःचा सरकार मार्फत वयेधुंकाः आः पुनःस्थापना व समायोजन यायेगु मोडालिटि नापं मापदण्ड याकन क्वःछिइगु ज्याय् ग्वाहालि यायेत कोइरालायात इनाप याःगु खः ।
खँल्हाबंलाया झ्वलय् कांग्रेस सभापति कोइरालां लडाकु शिविरया ताःचा सरकारयात लःल्हायेगु ज्याया लसकुस यानादिसें शान्ति प्रक्रिया क्वचायेकेत अझ अप्व इमान्दार जुइत इनाप यानादीगु खः ।
