नेतृत्वं आत्मालोचना याःसा विवाद समाधान : गजुरेल

एनेकपा (माओवादी)या छ्याञ्जे सीपि गजुरेलं थःगु पार्टीया नेतृत्वं आत्मालोचना याःसा लडाकु शिविरया ताःचा लःल्हायेधुंकाः पिहांवःगु विवाद समाधान जुइगु धयादीगु दु ।

'लःल्हायेधुंकूगु ताःचा लितवइ मखु धकाः झीसं नं सिउ' गजुरेलं धयादिल, 'तर नेतृत्वं उगु घटना पार्टी निर्णय अःख जूगु धकाः आत्मालोचना याःसा विवाद समाधान जुइ ।'

सोमवाः येँय् जूगु छगू साक्षात्कार ज्याझ्वलय् वय्कलं पार्टी नेतृत्वं उगु निर्णय गल्ती जूगु स्वीकार मयातले थःपिंसं सरकारय् ब्वति मकायेगु स्पष्ट यानादिल । वय्कलं ताःचा लःल्हायेगु ज्यां सेना समायोजन यायेत ग्वाहालि जुइगु मखसें लडाकुतय्त निःशस्त्रीकरण यानाः इमित विघटन यायेत स्वःगु धयादिल ।