विमानय् छुँ दुहांवनेवं वायु सेवा निगमया उडान रद्द

सोमवाः सुथय् येँया अन्ताराष्ट्रिय विमानस्थलं बैंककपाखे ब्वयेत्यंगु विमानय् छुँ दुहांवनेवं नेपाल वायु सेवा निगमया उडान रद्द जूगु दु ।

सच्छि व स्वीस्वम्ह यात्रुत ज्वना सुथय् ९ बजे बैंककपाखे वनेत्यंगु बोइङ ७५७ नाइन-एन-एसीबी विमानय् छुँ लूगु खः । विमान ब्वयेकेत ठिक्क जूगु इलय् खाना ल्ह्येगु ट्रेपाखें छुँ तिन्हुयाः विमानया ल्यूने भागय् बिस्युंवंगु खः । आः तक छुँ मलूगुलिं वायु सेवा निगमया विमान ग्रायन्डेड यानातःगु दु ।

विमानय् दुगु छुँ मलुइकं विमान ब्वयेकेमज्यूगु धासें आः उगु विमानया फुक्कं उडान रद्द याःगु दु । वायु सेवा निगमं अन्तराष्ट्रिय स्तरय् उडानया निंतिं थ्वहे छगः विमान जक छ्यलाच्वंगु खःसा आः थुगु विमानं नं थःगु उडान रद्द यायेवं वायु सेवा निगमया फुक्कं अन्तराष्ट्रिय उडान ठप्प जूगु दु ।