मन्त्रिपरिषद् विस्तार / माओवादीपाखें खुम्ह व मोर्चापाखें न्हय्म्ह
प्रधानमन्त्री डा. बाबुराम भट्टराईं आइतवाः मन्त्रिपरिषद विस्तार यानादीगु दु । वय्कलं राष्ट्रपति डा. रामवरण यादवया उपस्थितिइ माओवादीपाखें खुम्ह व संयुक्त लोकतान्त्रिक मधेशी मोर्चापाखें न्हय्म्हेसित सपथ ग्रहण याकादीगु खः ।
आइतवाः विस्तारित मन्त्रिमण्डलय् माओवादीपाखें नारायणकाजी श्रेष्ठ 'प्रकाश'यात उपप्रधान नापं परराष्ट्रमन्त्रीया जिम्मेवारी बिउगु दु । अथेहे वर्षमान पुन 'अनन्तं' अर्थ, पोष्टबहादुर बोगटीं ऊर्जा, टोपबहादुर रायमाझीं स्थानीय विकास, प्रभु शाहं भूमिसुधार व कमला रोकां युवा तथा खेलकुद मन्त्री कथं शपथ कयादीगु खः ।
माओवादीपाखें छ्याञ्जे सीपि गजुरेलयात उपप्रधानमन्त्री दयेकेगु तयारी जुयाच्वंगु खःसां लडाकू शिविर व ल्वाभःया कन्टेनरया ताःचा बारे विवाद जुइवं मोहन वैद्य 'किरण' पक्षया नेतातय्सं सरकारय् ब्वति मकागु खः ।
उखे झिंस्वंगू मन्त्रालय दाबी यानाच्वंगु मोर्चापाखें आइतवाः न्हय्म्ह जक नेतातय्सं सपथ ग्रहण यात । मोर्चापाखें जयप्रकाश प्रसाद गुप्तां सूचना व साचार, हृदेश त्रिपाठीं भौतिक योजना व निर्माण, महेन्द्र राय यादवं सिँचाइ, मोहम्मद वकील मुसलमानं वन, नन्दनकुमार दत्तं कृषि, राजेन्द्र महतों स्वास्थ्य व राजलाल यादवं विना विभागिय मन्त्री कथं सथप ग्रहण यानादीगु खः ।
