मन्दीं वैदेशिक रोजगारय् वनीपिं नेपाःमि ज्यामित म्हो जुल
येँ (सन्ध्या टाइम्स) / वैदेशिक रोजगारया निंतिं पिहां वनीपिनिगु ल्याः म्हो जूगु दु । आर्थिक मन्दीया प्रभावं विश्वयात हे लिच्वः लाकाच्वंगु अवस्थाय् वैदेशिक रोजगारया निंतिं पिहां वनीपिं नेपाःमिया ल्याः म्हो जूगु खः ।
थगुने वैशाखया ल्याखय् थुगु दँया वैशाखया दुने रोजगारया निंतिं पिहां वनीपिं नेपाःमिया ल्याः झंडै बछिं मल्याक कुहां वःगु दु ।
वैदेशिक रोजगार विभागं बिउगु जानकारी कथं थगुने वैशाखय् वैदेशिक रोजगारया निंतिं नीछद्वःया ल्याखय् नेपाःमित पिहां वंगु खःसा थुगुसीया वैशाखय् झिंछद्वः जक पिहां वंगु दु ।
विभागं थुगुसी रोजगारया निंतिं वंपिं मध्ये संस्थागत स्वीकृति कयाः झंडै च्याद्वः व व्यक्तिगत स्वीकृति कयाः स्वद्वः वंगु खः धाःगु दु ।
तर वैदेशिक रोजगारया निंतिं वनीपिं मिस्तय् ल्याः धाःसा अप्वःगु दु । मिस्तय् ल्याः थगुने स्वयां अप्वःसां आः वयाः थ्व ल्याः नं म्हो जुया वनाच्वंगु दु ।
तच्वःगु आर्थिक मन्दीया कारणं छखे रोजगारदाता कम्पनीतय्सं कामदारत म्हो जक कायेगु यानाच्वंगु दुसा मेखे आः दुपिं कामदारत नं क्वपाला वयाच्वंगु दु ।
तर छेँय् ज्या याईपं घरेलु कामदारया ल्याः धाःसा तुलनात्मक रुपं अप्व वनाच्वंगु दु ।
मन्दी शुरु जुइवं न्हूगु सम्झौता मजूगुलिं नं रोजगारया निंतिं पिहां वनीपिं कामदारत म्हो जूगु खः । तर मन्दीया वावजूद नं वंगु फागुण व चैत्रय् धाःसा उल्लेख्य मात्राय् कामदारत पिहां वःगु खः ।
वंगु फागुणय् जक करीब १४ हजारया ल्याखय् व चैत्रय् १४४०० या ल्याखय् थीथी देशय् नेपाःमि कामदारत रोजगारया निंतिं पिहां वंगु खः तथ्यांक विभागं बिउगु दु ।
वैशाखय् जक मलेशियाय् वंपिं कामदारत थगुने वैशाखय् स्वयां ८० प्रतिशतं घटे जूगु दु ।
अथे हे साउदी अरबय् वंपिं कामदारत नं घटे जूगु दु । थगुने वैशाखय् जक साउदी अरब वंपिं कामदारया ल्याः ४८०० दुगु खःसा थुगुसी वैशाखय् २८०० नेपाली कामदारत साउदी अरब वंगु दु ।
तर कतार वंपिं नेपालीतय् ल्याः धाःसा अप्वःगु दु । थगुने वैशाखय् ३ हजार नेपाली कामदारत कतार वंगु खःसा थुगुसीया वैशाखय् उगु ल्याः थहां वनाः ६७०० थ्यंगु दु ।
