सुरेश किरणया चिनाखँ मुना उलेज्या
नेपालभाषाया न्हिपौ 'सन्ध्या टाइम्स'या सम्पादक सुरेश किरण मानन्धरया न्हापांगु चिनाखँ मुना सफु 'थौं घण्टाघरं जिके ई न्यनाच्वन' उलेज्या जुल ।
येँया गणबहालय् च्वंगु नेपाल आदर्श माध्यमिक विद्यालयय् शनिवाः जूगु छगू अनौपचारिक ज्याझ्वःया दथुइ सफु च्वमि सुरेश किरणं हे सफुया उलेज्या यानादीगु खः । च्वसापासाया लुखां पिदंगु सफु उलेज्या ज्याझ्वःलय् जनकवि दुर्गालाल श्रेष्ठं सुरेश किरणं खय् भासं च्वइगु नं तस्कं स्तरीय जूगु धयादिसें खय् भाय् पाखें च्वयाः यक्व कमे यायेफइगु खःसां कविं सुरेश किरणं नेपालभाषा क्षेत्रय् ताः ई निसें योगदान बियाच्वंगु धयादिल । वय्कलं सुरेश किरणं नेपालभाषायात योगदान बियाः कायेगु स्वयां अप्वः बियाच्वंगु धयादिल ।
ज्याझ्वलय् च्वमि डा. केशवमान शाक्य व कवि बुद्ध साय्मिं सुरेश किरणया कवितात आधुनिक जूगु धयादिसें कविं थःगु च्वसाय् थः दुने दुगु खँत स्पष्ट रुपं पिने हयेत ताः लाःगु धयादिल ।
च्वसापासाया छ्याञ्जे भुषणप्रसाद श्रेष्ठं न्ह्याकादीगु ज्याझ्वल् कवि सुरेश किरणं थःगु सफुतिइ दुथ्याःगु प्यपु चिनाखँ ब्वनाः न्यंकूगु खःसा मेगू छपु चिनाखँ कवियत्री प्रतिसरा साय्मि ब्वनान्यंकादीगु खः । ज्याझ्वलय् च्वसापासाया नायः पद्मरत्न तुलाधरं सुभाय् बियादीगु खः ।
