शिविर व कन्टेनरया ताःचा लःल्हात / वैद्यपाखें निर्णया विरोध

एकीकृत नेकपा (माओवादीं) थःगु लडाकूत च्वनाच्वंगु न्हय्गू मू शिविरय् व अन तयातःगु ल्वाभःया कन्टेनरया ताःचा सेना समायोजन विशेष समितियात लःल्हाःगु दु ।

बुधवाः च्वंगु समितिया मुँज्यां निर्णय याः कथं माओवादीं लडाकू शिविर व ल्वाभःया ताःचा विशेष समिति मातहतया अनुगमन पुचःयात बिहीवाः लःल्हाःगु खः । ताःचा लःल्हाये न्ह्यः माओवादी नायः पुष्पकमल दाहाल 'प्रचण्ड'या छेँय् लाडकू कमाण्डरय् मुँज्या च्वंगु खःसा उगु मुँज्यां ताःचा लःल्हायेगु सहमति याःगु खः ।

थ्वहे दथुइ माओवादी वरिष्ठ न्वकु मोहन वैद्य 'किरणं' सरकारयात ताःचा लःल्हायेगु निर्णयया विरोध याःगु दु । वय्कलं क्यान्टोनमेन्ट व ल्वाभःया ताःचा लःल्हानाः लडाकूतय्त निशस्त्र यानाः विघटन यायेत स्वःगु द्वपं बियादीगु दु ।