जेठ १८ गते नेवाः शक्ति क्यने
येँ (सन्ध्या टाइम्स) / नेवाः स्वायत्त राज्य मंकाः संघर्ष समितिं जेठ १८ गते नेवाः स्वायत्त राज्य माग यासें यायेत्यंगु नेपालमण्डल बन्द ज्याझ्वः ताःलाकेगु निंतिं म्हिगः असनय् प्रचार सभा यात । सभाय् न्ववासें नेवाः देय् दबूया नायः
नरेश ताम्राकारं माल धाःसा नेवाःत थःगु अधिकारया निंतिं न्ह्याः वनेफुपिं खः धइगु दसि जेठ १८ गते क्यनी धयादिल । नेपाः राष्ट्रिय पार्टीया न्वकु नापं नेवाः ल्याय्म्ह न्ह्यलुवाया संयोजक नरेशवीर शाक्यं नेवाः स्वायत्त राज्य छु खः थ्व खँ स्पष्ट रुपं आम जनतां ध्वाथुइमाः धयादिल । नेपाः लोकतान्त्रिक नेवाः संघया नायः सानुराजा शाक्यं नेवाःतय्गु सवालय् आः गुगुं नं पार्टी सुम्क च्वने मजिउगु बिचाः प्वंकुसें स्वायत्त राज्यया निंतिं निरन्तर संघर्ष न्ह्याकेमाः धयादिल । नेवाः जागरण माचया संयोजक सुजीव बज्राचार्यं न्हूगु संविधानय् नेवाः भूमियात नेवाः स्वायत्त राज्य धकाः घोषणा मयात धाःसा उकिया विरुद्धय् नेवाःतय्सं समानान्तर नेवाः सरकार दयेकीगु ख्याच्वः बियादिल ।
सभापतिया थासं न्ववासें नेवाः राष्ट्रिय मुक्ति मोर्चाया येँया इन्चार्ज उमेश स्थापितं जेठ १८ गते बन्द ताःलाकेगु निंतिं फुक्क नेवाःतय्त सतकय् कुहां वयेत आह्वान यानादिल ।
