शिविर व ल्वाभःया ताःचा कन्हय् निसें विशेष समिति मातहत
एनेकपा (माओवादी)या लडाकुतय् शिविर व ल्वाभः तयातःगु कन्टेनरया ताःचा बिहीवाः निसें औपचारिक रुपं सेना समायोजन विशेष समिति मातहत वइगु जूगु दु ।
विशेष समितिया बुधवाः च्वंगु मुँज्यां समिति अन्तर्गतया अनुगमन समितियात बिहीवाः शिविर व कन्टेनरया ताःचा लःल्हायेगु निर्णय याःगु खः । मुँज्या लिपा समिति दुजः जयप्रकासप्रसाद गुप्तां कन्हय् हे ताःचा लःल्हायेगु व तुरुन्त लडाकु पुनःवर्गीकरण यायेगु निर्णय जूगु जानकारी बियादिल ।
प्रधानमन्त्री डा. बाबुराम भट्टराईया आव्हानय् समितिया मुँज्या च्वने न्ह्यः स्वंगू प्रमुख दलतय् मुँज्यां लडाकु व ल्वाभःयात विशेष समिति मातहत हयेगु निर्णय याःगु खः ।
थ्वस्वयां न्ह्यः माओवादीं थःगु नेतृत्वय् सहमतिय सरकार गठन जूसाः भदौ १४ गते दुने हे लडाकु पुनःवर्गीकरण यायेगु व लत्याःया दुने सेना समायोजन यायेगु खाका न्ह्यब्वःगु खः ।
