प्रधानमन्त्रीं सरकारय् वयेत याःगु इनाप एमालेपाखें अस्वीकार
प्रधानमन्त्री डा. बाबुराम भट्टराईं वर्तमान सरकारय् ब्वति कायेत याःगु इनाप नेकपा (एमालें) अस्वीकार याःगु दु ।
एमालेया नायः झलनाथ खनालयात बुधवाः सुथय् नापलाय्गु झ्वलय् प्रधानमन्त्री भट्टराईं वर्तमान सरकारयात राष्ट्रिय सहमतिय सरकार दयेकेगु धयादिसें सरकारय् ब्वति कायेत इनाप यानादीगु खः । लिसःलय् खनालं वर्तमान अवस्थाय् राष्ट्रिय सहमतिय सरकार गठन जुइमफइगु धयादिसें एमालें वर्तमान सरकारय् ब्वति मकाइगु धयादिल ।
येँया डल्लुस्थित एमाले नायः खनालया छेँय् जूगु खँल्हाबंलाय् वय्कलं एमाले सरकार पिने च्वनाः हे शान्ति प्रक्रिया व संविधान निर्माणया ज्या पूवंकेत ग्वाहालि याइगु धयादीगु खः ।
प्रधानमन्त्री भट्टराईं मंगलवाः कांग्रेस सभापति सुशील कोइरालायात नं नापलाना सरकारय् ब्वति कायेत इनाप यानादीगु खःसा वय्कलं नं वर्तमान सरकारय् कांग्रेसं ब्वति मकाइगु स्पष्ट यानादीगु खः ।
