मलिना जुल थुगुसिया मिस नेपाल
धरानया २३दँ दुम्ह मलिना जोशी थुगुसीया मिस नेपाल २०११ जुइत ताः लाःगु दु । एमबीएया विद्यार्थी जोशीं १८म्ह मेपिं प्रतिस्प्रधीतय्त लिउने लाकाः मिस नेपालया ताज पुइत सफल जूगु खः । येँया भद्रकालीस्थित आर्मी अफिर्स क्लबय् मंगलवाः जूगु धेंधेंबल्लाय् मिस नेपाल जुइवं जोशीयात पुलाम्ह मिस नेपाल सदिक्षा श्रेष्ठं ताज पुइकाबिउगु खः ।
धेंधेंबल्लाय् अनुपमा गुरुङ फस्ट रनरप जुलसाः सकेन्ड रनरअपया उपाधि सरिना मास्कें त्याकूगु दु । अथेहे थुगुसि निसें तँगु थर्ड रनरअप व फोर्थ रनरअपया उपाधि मनिषा विष्ट व नेहा पौडेलं त्याकूगु दु । अथेहे मिस ब्युटी हेयरया उपाधि अनुपमा गुरुङ, मिस फोटोजेनिक मनिषा विष्ट, मिस ब्युटिफूल स्माइल प्रतीभा श्रेष्ठ, मिस पर्सनालिटी नम्रता दाहाल, मिस ब्युटीफूल कम्लेक्सन नीता योगी, मिस ट्यालेन्ट विष्णु चेम्जोङ व मिस पपुलर नेहा पौडेल जूगु दु ।
हिडन ट्रेजरं ग्वसाःग्वःगु थुगु धेंधेंबल्लाय् मिस नेपालया ताज त्याकूम्ह मलिनां वइगु मिस वर्ल्ड धेंधेंबल्लाय् नेपाःया प्रतिनिधित्व याइसाः फस्ट रनरप व सकेन्ड रनरअप जूपिंसं मिस अर्थ व मिस इन्टरनेस्नलय् ब्वति काइ ।
