माओवादी मन्त्रीत ल्ययेगु जिम्मा प्रमुख स्वम्ह नेतातय्त
एनेकपा (माओवादी)या स्थायी समिति मुँज्यां सरकारय् वनीपिं मन्त्रीतय् नां ल्ययेमफेवं उकिया जिम्मा पार्टीया स्वम्ह प्रमुख नेतातय्त बिउगु दु ।
माओवादी मू ज्याकू पेरिस डाँडा कोटेश्वरय् मंगलवाः च्वंगु मुँज्याय् मन्त्रीत जुइपिनि नांमय् विवाद जुइवं मन्त्रीत ल्ययेगु जिम्मा पार्टी नायः पुष्पकमल दाहाल 'प्रचण्ड', वरिष्ठ न्वकु मोहन वैद्य 'किरण' व प्रधानमन्त्री नापं पार्टी न्वकु डा. बाबुराम भट्टराईयात बिउगु खः ।
स्थायी समिति मुँज्याय् नायः प्रचण्डं पोष्टबहादुर बोगटीयात उपप्रधानमन्त्री कथं छ्वयेगु प्रस्ताव यानादीगु खःसा न्वकु किरणं छ्याञ्जे सीपि गजुरेलयात उपप्रधान नापं परराष्ट्रया जिम्मेवारी बिइमाःगु प्रस्ताव तयादीगु खः । अथेहे न्वकु नारायणकाजी श्रेष्ठ 'प्रकाशं' धाःसा थःत उपप्रधान नापं अर्थ मन्त्री दयेमाःगु माग यानादीगु खः ।
अथेहे मुँज्यां लडाकु पुनःवर्गिकरणया निंतिं कन्हय् छगू पुचः छ्येगु निर्णय नं स्थायी समिति मुँज्यां याःगु दु ।
