सरकारय् ब्वति कायेत कांग्रेसयात प्रमया इनाप
प्रधानमन्त्री डा. बाबुराम भट्टराईं नेपाली कांग्रेसयात थःगु नेतृत्वया सरकारय् ब्वति कायेत इनाप याःगु दु ।
मंगलवाः सुथय् महाराजगञ्जस्थित कांग्रेस सभापति सुशील कोइरालाया छेँय् थ्यंकाः प्रधानमन्त्री भट्टराईं सरकारय् ब्वति कायेत इनाप यानादीगु खः । वय्कलं थःगु सरकार बहुमतिय जूसां बहुमतिय दुने नं राष्ट्रिय सहमतिय सरकार दयेकेत थः प्रतिबद्ध दुगु खँ न्ह्यथनादीगु खः ।
लिसःलय् कांग्रेस सभापति कोइरालां यथास्थितिइ कांग्रेसं सरकारय् ब्वति काइगु सम्भावना मदुगु धयादिसें शान्ति व संविधान निर्माणया अभिभारा पूवंकेत भट्टराईयात इनाप यानादिल । वय्कलं शान्ति व संविधान निर्माण यायेत कांग्रेस सरकार पिने च्वनाः हे ग्वाहालि यायेगु धयादिल ।
अथेहे नापलाय् ज्या प्रधानमन्त्री भट्टराई्र शान्ति प्रक्रिया नापं संविधान निर्माण लगायत विषय क्यचायेकेत उच्चस्तरीय राजनीतिक संयन्त्र दयेकेगु प्रस्ताव तयादीगु खः । उगु प्रस्तावयात धाःसा कोइरालां सकारात्मक रुपं कयाः पार्टी दुने सहलह यानाः लिसः बिइगु धयादीगु खः ।
