संविधानसभाया ई हाकनं स्वला तन

लिपांगु खुसी तंगु इलय् छगू हे मुँज्या मच्वंसे संविधानसभाया ई हाकनं स्वलाया निंतिं तंगु दु ।

व्यवस्थापिका संसदया सोमवाः च्वंगु मुँज्यां दुइ तिहाई बहुमतं अन्तरिम संविधानय् झिक्वःखुसी संशोधन यासें संविधानसभाया ई वइगु मंसिर १४ गते तकया निंतिं तंगु दु ।

संसदय् जूगु चुनावय् सरकारं न्ह्यब्वःगु संविधान संशोधन विधेयकया पक्षय् न्यासः व स्वीन्हय्कू व विपक्षय् प्यकू मत कुतुंवंगु खः । संसदया मुँज्याय् न्यासः व पीछम्ह सभासदतय्गु जक उपस्थिति दुगु खः । संविधानसभाया ई तनेगु निंतिं संविधानसभाया मुँज्या सोमवाः जक स्वक्वः तक च्वंगु खः ।

न्हापांगु मुँज्यां संविधान संशोधन विधेयक न्ह्यब्वयेत अनुमति काःगु खःसा निक्वःगु मुँज्यां राष्ट्रिय प्रजातन्त्र पार्टी नेपालं संशोधन प्रस्ताव बहुमतं अस्वीकृत यासें संशोधन दर्ताया न्हय्-निघौया व्यवस्था निलम्बन याःगु खः । अथेहे स्वक्वःखुसी च्वंगु मुँज्याय् विधेयकया सैद्धान्तिक पक्षय् सहलह यानाः प्रस्तावयात क्वःछिइकथं न्ह्यब्वःगु खः ।

वंगु जेठ १४ गते संविधानसभाया ई स्वलाया निंतिं तंगु इलय् भदौ १४ गते संविधानया न्हापांगु एकिकृत मस्यौदा हयेगु सहमति जूसां कार्यान्वयन धाःसा जुइमफुत । अझ नं दलत दथुइ राज्य पुनःर्संरचना, शासकीय स्वरुप व निर्वाचन प्रणाली लिसेंया मू मू विषयस विवाद ल्यनाच्वंगु दनि ।

जेठ १४ गते संविधानसभाया ई तनेधुंकाः संवैधानिक समितिया मुँज्या छक्वः जक च्वंगु खःसा माओवादी नायः पुष्पकमल दाहाल 'प्रचण्ड'या संयोजकत्वय् दुगु विवाद समाधान उपसमिति निष्कृय हे जुल । अथेहे संविधानसभाया मुँज्या जेठ १४ लिपाया सोमवाः हे च्वंगु खः ।

सोमवाःया मुँज्याय् सभासद गगन थापा बाहेक सुं नं सभासदं संविधान निष्कृय जूगु विषययात कयाः बिचाः न्ह्यमब्वःगु खः । सभासद थापां मत तयेत जक मुँज्या सःतूगु खँय् आक्रोस प्वंकादिल । वय्कलं थःपिं हे थःगु अधिकारपाखें बञ्चित जूगु खँ धयादिसें संविधानसभाया नायलं तकं प्रभावकारी भूमिका म्हितेमफूगु खँय् ध्यानआकर्षण याकादिल । 'सभाध्यक्षं नं सदनया मर्यादा तयेमा, आसनय् जक च्वना टुलुटुलु स्वयेमजिउ', सभासद थापां धयादिल ।

२०६५ साल जेठ १५ गते न्हापांखुसी च्वंगु संविधानसभाया ई दच्छिया निंतिं क्वःछिउगु खः । निदँया दुने संविधान दयेके मफयेवं दच्छिया ई तंगु खः । उकिया दुने नं ज्या मजुइवं वंगु जेठ १४ गते संविधानसभाया ई स्वलाया नितिं तंगु खः ।