राष्ट्रिय सहमतिया साझा ज्याझ्व निर्माण यानाः सरकार संचालन : एमाले
न्हूगु सरकारया नेतृत्व याःगु नेकपा (एमालें) सरकार संचालनया निंतिं राष्ट्रिय सहमतिया साझा ज्याझ्व निर्माण यानाः न्ह्याः वनेगु निर्णय याःगु दु ।
आइतवाः एमालेया केन्द्रीय ज्याकू बल्खुइ जूगु स्थायी समितिया बैठकं थ्व निर्णय याःगु खः । अथेहे साझा ज्याझ्व निर्माण यायेत थीथी दलत नाप खँल्हाबंला यायेत पार्टी अध्यक्ष झलनाथ खनालया नेतृत्वय् छगू कार्यदल गठन याःगु दु । कार्यदलय् अध्यक्ष खनाल सहित महसचिव ईश्वर पोखरेल, सचिव शंकर पोखरेल, व केन्द्रीय दुजःत सुरेन्द्र पाण्डे व राघु पन्त च्वनादीगु दु ।
थौं च्वंगु बैठकं प्रधानमन्त्री माधव नेपालयया सपथ ग्रहण कन्हय् सुथय् यायेगु नं निर्णय याःगु दु । अथेहे एमालें थःगु पार्टीं सरकारय् गुगु मन्त्रालय् कायेगु धकाः नेपाली कांग्रेस नाप सहलह यायेधुंकाः तिनि क्वछीगु निर्णय याःगु दु । एमालें नेपाली कांग्रेस नाप सरकार संचालन व मन्त्रालय बाँदफाँदया बारे थौं न्हिनय् सहलह यायेत्यंगु दु ।
