न्हूम्ह प्रम सहिदगेट मवँसे पुष्पलालया झ्वाताय्

येँ (सन्ध्या टाइम्स)/म्हिगः व्यवस्थापिका संसदपाखें बहुमतं निर्वाचित जुयादीम्ह न्हूम्ह प्रधान मन्त्री डा. बाबुराम भट्टराई सपथ ग्रहण याये धुनेवं श्रद्धांजलि प्वंकेत सहिदगेटय् मवँसे किपुली वनीगु जूगु दु। माओवादीया उपाध्यक्ष डा. भट्टराई गणतन्त्र नेपाःया न्हापांगु सरकारया अर्थ मन्त्री जुयाः ज्या यानादीधुंकूम्ह खः ।

न्हापा न्हापायापिं प्रधानद्द मन्त्रीत सपथ ग्रहण धुनेवं सहिद गेटय् वनाः सहिदपिंत श्रद्धांजलि प्वंकीगु चलन दुगु खःसां डा. भट्टराईनं उगु परम्परायात त्वाःथलाः थौं दकलय् न्हापां किपूया चम्पादेवी लागाय् च्वंगु नेपाल कम्युनिष्ट पार्टीया संस्थापक महासचिव पुष्पलाल श्रेष्ठया झ्वाताय् स्वांमाः क्वखायेकाः श्रद्धांजलि प्वंकीगु जूगु दु। वय्कःयात अन माधव नेपाल अध्यक्ष जुयाच्वंगु पुष्पलाल स्मृति प्रतिष्ठानपाखें लसकुस याइगु ज्याझ्वः दुगु खँ सीदुगु दु।
प्रधानमन्त्री भट्टराई नाप नापं एकीकृत माओवादीया मेपिं नेतात नं अन वनीगु ग्वसाः दु ।

खनालं थौं १ बजे वालुवाटार त्वःतीगु
निवर्तमान प्रधानमन्त्री झलनाथ खनालं थौं न्हिनय् १ बजे वालुवाटार खाली यानादीगु जूगु दु। न्हूम्ह प्रधानमन्त्री डा. बाबुराम भट्टराईनं सपथ ग्रहण यानादीवं हे पुलांम्ह प्रम खनालं वालुवाटार त्वःता वनेगु नितिं थौं सुथंनिसें थःपिनि निजी सामान प्याकिङ्ग यानाच्वंगु दु। भाजु खनाल वालुवाटारं तप्यंक डल्लुइ च्वंगु थःगु हे छेँय् लिहां झाइगु खँ वय्कःया प्रेस सल्लाहकार सूर्य थापां कनादीगु दु। न्हूम्ह प्रधानमन्त्री भट्टराई धाःसा औपचारिक रुपं कन्हय् जक वालुवाटार प्रवेश जुइगु ज्याझ्वः दु। अन वय्कलं न्हापांनिसें याना वयाच्वंगु परम्परागत ज्याखँत मयाइगु खँ नं धाःगु दु ।