स्वंगू फोरमपाखें गृह, संचार व परराष्ट्र सहित स्वम्ह हे उपप्रम
येँ (सन्ध्या टाइम्स)/न्हूम्ह प्रधानमन्त्री डा. बाबुराम भट्टराईया सरकारय् सरकारयात समर्थन याःगु स्वंगू फोरम-मधेसी जनअधिकार फोरम, फोरम (लोकतान्त्रिक) व फोरम (गणतान्त्रिक)पाखें स्वम्ह हे उपप्रधानमन्त्री जुइगु जूगु दु ।
विज्ञ सूत्रं बिउगु जानकारी कथं फोरम लोकतान्त्रिकया अध्यक्ष विजय गच्छेदार उप प्रम लिसें गृह, फोरम गणतान्त्रिकया अध्यक्ष जयप्रकाश गुप्ता उपप्रम लिसें सञ्चार व फोरमया अध्यक्ष उपेन्द्र यादव उपप्रम लिसें परराष्ट्रमन्त्री जुयादी। थ्व स्वंगुलिं फोरम न्हापा छगू हे पार्टी खः। थौं दयेकीगु चीधंगु मन्त्रिमण्डलय् उपप्रम लिसें गृहमन्त्री कथं गच्छेदारं सपथ ग्रहण याइ ।
आः आवास तथा भौतिकय् ह्दयेष त्रिपाठी, आपूर्तिइ राजेन्द्र महतो, उद्योगय् महेन्द्र राय यादव वनीगु खँ दु। मधेसी मोर्चां १३ गू मन्त्रालय फ्वनाच्वंगु दुसा वयात १२ गू तक बीगु खँ दु ।
हिसिला मन्त्री मजुइगु
न्हूम्ह प्रधानमन्त्री डा. बाबुराम भट्टराईया जहान मय्जु हिसिला यमिं थः जहानया मन्त्रिमण्डलय् थः मन्त्री मजुइगु खँ धयादीगु दु। झलनाथ खनालया सरकारय् वय्कः भूमिसुधार मन्त्री जुयादीम्ह खः। प्रधानमन्त्रीया कलाः वा भाःतया हैसियत 'फर्स्ट लेडी' यागु जूवनी। राजनीतिक व्यक्तित्व खःसां मय्जु यमिं थुगुसी 'फर्स्ट लेडी'या भूमिका ल्ययादीगु दु ।
