उपकुलपति डा.महर्जनयात हना

येँ (सन्ध्या टाइम्स)/नेवाः देय् गुथि नेपालमण्डलं त्रिभुवन विश्वविद्यालयय् उपकुलपति नियुक्त जुयादीम्ह प्रा. डा. हेराबहादुर महर्जनयात हनेगु ज्या यात। गुथिं वय्कःयात नेवाः संस्कार कथं ख्यें सगं नापं बेतालिं चिकाः हंगु खः। गुथिया नायः मोहनबहादुर महर्जनं उपकुलपति डा. महर्जनयात हनापौ नं लःल्हानादिल ।

ज्याझ्वलय् न्ववासें देय्गुथिया सल्लाहकार नरेन्द्रभक्त हाडां नेपालभाषा पठनपाठनयात आः सशक्त ढंगं न्ह्याकेमाःगु खँ कनादिलसा न्वकु डा. चुन्दा बज्राचार्यं नेपालभाषा केन्द्रीय विभागयात आः नेवारीलोजी दयेके माःगु विचाः प्वंकादिल। कृष्णभक्त मानन्धरं लसकुस यानादीगु उगु ज्याझ्वलय् सभासद् बुद्ध साय्मि, सल्लाहकार राजेन्द्र श्रेष्ठ, नेवाः देय् दबूया नायः नरेश ताम्राकारपिंसं नं थःथःगु बिचाः प्वंकादीगु खः ।

उकथं हे त्रिविविया उपकुलपति पदय् न्हापांम्ह किपूमि कथं नियुक्त जुयादीम्ह डा. महर्जनयात नेवाः स्वायत्त राज्य मंकाः परिषद् किपूपाखें नं हन। किपूमि जनतां याःगु आन्दोलनया बलं वय्कः उगु पदय् नियुक्त जुयादीगुलिं वय्कःयात हनेज्या याःगु खः। प्रा. माणिकलाल श्रेष्ठ मूपाहां जुयादीगु उगु हने ज्याझ्वलय् सांस्कृतिक बाजं थानाः पिहां वःगु र्‍यालीं देय् चाःहिउगु खः ।