९३१म्ह नागरिकत अझ नं बपेत्ता
नेपालय् सशस्त्र द्वन्द्व क्वचाःगु घोषणा न्यादँ न्ह्यः हे जूगु खःसां अझ नं राज्य व गैरराज्य पक्षं बेपत्ता यानातःपिं नागरिकत मालेगु ज्या जूगु मदुनि । बेपत्ता नागरिकत मालेगु ज्या मजूगु हुनिं हे माओवादी सशस्त्र द्वन्द्व सुरु जूसां निसें आः तक राज्य व गैरराज्य पक्षं आपालं नागरिकत बेपत्ता जुयाच्वंगु तथ्यांक सार्वजनिक जूगु दु ।
एड्भोकेसी फोरम नेपाल व अनौपचारिक क्षेत्र सेवा केन्द्र इन्सेकं सोमवाः मंकाः कथं सार्वजनिक याःगु 'उनीहरु कहाँ छन्?' धइगु प्रतिवेदनय् ९३१म्ह नागरिकत अझ नं बेपत्ता अवस्थाय् हे दुगु खँ न्ह्यथनातःगु दु । उगु प्रतिवेदनय् राज्यपाखें ८२१म्ह व गैरराज्य पक्ष ११०म्ह नागरिकत बेपत्ता यानातःगु तथ्यांक क्यनातःगु दु ।
अप्व नागरिकत बेपत्ता याःगु जिल्लाय् बर्दिया, दाङ, बाँके, सल्यान व रोल्पा जूगु प्रतिवेदनय् न्ह्यथनातःगु दु । ज्याझ्वलय् अधिकारकर्मीतय्सं लिबाक्क जूसां बेपत्ता नागरिकया छानबिन व तथ्य पत्ता लगे यायेगु कथं ‘व्यक्ति बेपत्ता पार्ने (कसुर व सजाय) विधेयक' संसदय् प्रस्तुत याःगु सकारात्मक जूगु न्ह्यथंसे याकनं बेपत्ता नागरिकतय् अवस्था सीकेमाःगु खँय् बः बिउगु खः ।
