बाबुराम भट्टराई नेपाःया ३५क्वःगु प्रधानमन्त्री
पौडेल १८क्वःगु खुसिइ नं बुत
एनेकपा (माओवादी)या न्वकु डा. बाबुराम भट्टराई नेपाःया ३५क्वःगु प्रधानमन्त्री जुयादीगु दु । व्यवस्थापिका संसदय् आइतवाः प्रधानमन्त्री पदया निंतिं जूगु निर्वाचनय् थः प्रत्यासी कांग्रेस उपसभापति रामचन्द्र पौडेलयात बुकाः वय्कः प्रधानमन्त्री जुयादीगु खः ।
प्रधानमन्त्री निर्वाचनय् निर्णायक भूमिका म्हितुगु संयुक्त लोकतान्त्रिक मोर्चाया समर्थन सहित भट्टराईं ३४० मत हयाः निर्वाचित जुयादीगु खः । मुक्कं ५७५ सभासद्त उपस्थित जूगु थौंया मुँज्याय् वय्कःया प्रतिद्वन्द्वी पौडेलया पक्षय् जम्मा २३५ मत जक लाःगु खः ।
प्रधानमन्त्री जुइधुंकाः संचारकर्मीतय्त चिहाकःगु प्रतिक्रिया बियादिसें वय्कलं थःगु मुख्य प्राथमिकता शान्ति, संविधान व जनतायात राहत बिइगु धयादिल । वय्कलं थःगु ज्या चुनौतिपूर्ण जूसां थःम्हं इमान्दारिताया साथ ज्या यायेगु धयादिल । लोकतन्त्र, शान्ति व संविधान निर्माण प्रति थःगु प्रष्ट बिचाः नापं बौद्धिकताया हुनिं वय्कः जनताय् तसकं ल्वकंह्वाम्ह नेता कथं स्थापित जुयादीगु खः ।
उखे भट्टराईया प्रतिद्वन्द्वी पौडेल थौंया निर्वाचनय् नं पराजित जुइवं संसदय् प्रधानमन्त्री पदय् बूगु ल्याः १८क्वः थ्यंगु दु । भट्टराई प्रधानमन्त्रीलय् निर्वाचित जुइधुंकाः वय्कलं भट्टराईया कार्यकालया सफलताया कामना यानादिसें कांग्रेस धाःसा रचनात्मक रुपं प्रतिपक्षय् च्वनीगु धयादिल । वय्कलं शान्ति व संविधान निर्माणय् धाःसा प्रतिपक्ष व सत्तापक्ष मधासें सहमति यानाः न्ह्याः वनीगु धयादिल ।
