बन्दकर्तातय्सं बागू दर्जन गाडी च्याकल
येँ (सन्ध्या टाइम्स)/परशुराम तामाङया नेतृत्वय् दुगु ताम्सालिङ नेपाल राष्ट्रिय दलं आह्वान याःगु थौंया स्वनिगः बन्द अबज्ञा याःगुलिं थीथी थासय् बागू दर्जन गाडी तोडफोड याना बिउगु दु। येँनं खासा वनाच्वंगु बा. २ ख ९२२६ नम्बरया मिनीभ्यान अरनिको राजमार्गय् च्याका बिउगु दु। भ्वँतय् बा. १ ख ३६२६ नम्बरया ट्रक च्याका बिउगु दुसा यलय् छगः ट्याक्सी च्याकः बिउगु दु। कालोपुलय् नं गाडी च्याका बिउगु दुसा काभ्रेय् छगः मिनिवस च्याका बिउगु दु। संघीयता, गणतन्त्र, धर्म निरपेक्षता व ताम्सालिङ राज्यया माग यासें बन्द आह्वान याःगु खःसा बन्दं येँय् खास हे लिच्वः धाःसा लाःगु मदु। रुटया गाडी धाःसा म्हो जक चले जूगु दु। बन्दं ताम्सालिङ लागाय् धाःसा लिच्वः लाःगु दु ।
बन्दया झ्वलय् बौद्ध लागां स्वम्ह, चुच्चेपाटी लागां निम्ह, मकवानपुरं १६ म्ह, बालाजु लागां १२ म्हं मल्याक प्रदर्शनकारीत ज्वना यंकूगु खँ ताम्सालिङ राष्ट्रिय दलं धाःगु दु। बन्द ज्याझ्वः थौं सनिलय् तक जुइ धाःगु दु ।
