आक्रमण विरुद्ध माओवादीया प्रदर्शन
प्रहरीपाखें छानविन समिति गठन
येँ (सन्ध्या टाइम्स)/माओवादी सभासद् नापं मजदुर नेता शालिकराम जमकट्टेलयात म्हिगः बहनी आक्रमण याःगु घटनाया विरोधय् माओवादी कार्यकर्तातय्सं येँय् लगायत देय्या थीथी थासय् प्रदर्शन याःगु दु ।
माओवादी नेता व कार्यकर्तातय्सं जुलुस पिकयाः रत्नपार्क, सहिदगेट, पुतलिसतक लगायतया लागा चाःहिउगु खः। माओवादी नेता कार्यकर्तातय्सं छानवीन यानाः दोषीयात कारवाही यायेमाःगु लिसें शान्ति सुरक्षाया नं माग याःगु दु। माओवादीं उगु आक्रमणय् आपराधिक पुचःया ल्हाः दुगु आशंका याःगु दु। थ्वहे दथुइ मजदुर नेता जमकट्टेलयात आक्रमण याःगु घटनायात कयाः महानगरीय प्रहरी आयुक्तया कार्यालय रानीपोखरीपाखें बरिष्ठ प्रहरी उपरीक्षक केदरमानसिंह भण्डारीया संयोजकत्वय् न्याम्ह दुजः दुगु समिति दयेकूगु दु। उगु समितियात घटनाबारे याकनं हे छानविन यानाः प्रतिवेदन बुझे यायेत निर्देशन बिउगु दुसा समितिं थनिनिसें हे ज्या न्ह्याकी धाःगु दु। आक्रमणय् लानाः घाःपाः जूम्ह सभासद् जमकट्टेलयात आः नर्भिक अस्पतालय् वासः याकातःगु दु ।
