हस्तक्षेप विरुद्ध गृहमन्त्रीयात पौ
येँ (सन्ध्या टाइम्स)/नेवाः स्वायत्त राज्य सुनिश्चित यायेत नेवाः स्वायत्त राज्य मंकाः संघर्ष समितिं शुक्रवाः पिकाःगु मसाल जुलुसय् प्रहरीं हस्तक्षेप यानाः मसाल लाका यंकूगु खँयात कयाः म्हिगः संघर्ष समितिं उपप्रम लिसें गृहमन्त्री नारायणकाजी श्रेष्ठयात विरोधपत्र बिल। उगु इलय् गृहमन्त्री श्रेष्ठं समितिया पदाधिकारीपिनि न्ह्यःने प्रहरी हस्तक्षेपया लागिं क्षमा फ्वनादीगु खः ।
शुक्रवाः रत्नपार्कया शान्ति बाटीकां मसाल जुलुस पिकायेत्यंबलय् प्रहरीं हस्तक्षेप यानाः न्यासःपु मसाल लाका यंकूगु खःसा उगु इलय् प्रदर्शनकारी व प्रहरी दथुइ छझाः ल्वापु तकं जूगु खः। तर ल्वापु जूसां जुलुस धाःसा पिकयां तुं त्वःतल गुगु जोशी देगलय् थ्यंकाः क्वचाःगु खः।
प्रहरी हस्तक्षेप विरुद्ध म्हिगः गृह मन्त्रीयात विरोधपौ बीधुंकाः म्हिगः हे यलय् जूगु मसाल जुलुस धाःसा शान्तिपूर्ण रुपं क्वचाःगु खः ।
संघर्ष समितिपाखें थौं थिमिइ उकथं हे सिठ्ठी पुयाः मसाल जुलुस पिकायेगु ज्याझ्वः दयेकातःगु दु ।
