मधेशी मोर्चाया मत भट्टराईयात / भट्टराई प्रधानमन्त्री जुइगु पक्का
संयुक्त लोकतान्त्रिक मधेशी मोर्चां माओवादी न्वकु डा. बाबुरम भट्टराईयात प्रधानमन्त्री निर्वाचनय् मतदान यायेगु निर्णय याःगु दु ।
मधेशवादी न्यागू राजनीतिक दलत दुथ्याःगु मोर्चाया थौं च्वंगु मुँज्यां माओवादीयात मतदान यायेगु निर्णय यायेवं भट्टराई न्हूम्ह प्रधानमन्त्री जुइगु पक्का जूगु दु । प्रधानमन्त्रीया निर्वाचनय् निर्णायक भूमिका म्हिताच्वंगु मोर्चा व माओवादी दथुइ प्यंगू बुँदे सहमति जुइवं मोर्चां उगु निर्णय याःगु खः ।
मोर्चा व माओवादी दथुइ न्हय्द्वःया ल्याखाय् सेना समायोजन यायेगु, राज्य पुनर्संरचना आयोग गठन मयायेगु, शान्ति प्रकृयाया ज्या क्वचायेकेत माओवादी जनयुद्ध, मधेशी व जनजातितय् आन्दोलनय् राज्यपाखें पीडिततय्त राहत बिइगु नापं आन्दोलनया दौरान तयातःगु मुद्दात लितकाइगु नापं राज्यया फुक्कं निकाययात समावेशी यानाः यंकेगु सहमति जूगु दु ।
अथेहे भट्टराईया पक्षय् हे राष्ट्रिय जनमोर्चा, नेकपा एकीकृत व माले समाजवादी पार्टीं नं मतदान यायेगु निर्णय याःगु दु ।
